Цела Влада по инвестиции во Лондон

Груевски до британските бизмисмени: Дојдете во Македонија!

Висока македонска делегација предводена од премиерот Никола Груевски се наоѓа во Лондон каде ја претставува нашата земја како добра за инвестирање пред британските бизнисмени на конференцијата наречена „Инвестицискиот форум ’Обединето Кралство - Македонија’.

Груевски имаше настап на форумот, а неговите зборови беа дека Македонија е добра земја за водење бизнис. „Тоа најдобро го потврдува Светската банка која преку листата на Doing business неколку години по ред ја става Македонија на врвот на листата на реформатори и поволни бизнис дестинации“, рече македонскиот премиер.

Она што им го објаснува Владата на бизнисмените во Лондон е дека таа, како што рече Груевски, во континуитет работи на подобрување на бизнис климата.

Премиерот Груевски рекол и дека последниот извештај на Европската комисија е уште една потврда за добриот начин на кој Македонија се справува со предизвиците на економската криза. „Извршена е либерализација на девизното работење, подобрена е ефикасноста на банкарската супервизија, има долгогодишна макроекономска стабилност со ниска инфлација која во просек изнесува 2 отсто во последните 10 години“, им рече Груевски на Британците.

Аргументите на Владата со која настапи на вчерашната средба во Лондон се и дека во изминатите години во Македонија се спроведени реформи во пазарот на труд. „Во делот на даночната политика воведовме ниски и рамни даноци од 10 отсто, ја ослободивме од оданочување задржаната добивка која не се распределува во дивиденда, етапно ги намалуваме социјалните придонеси за една третина“, рече Груевски.

Премиерот ги наброи и странските фирми кои инвестираа во Македонија - Џонсон Контролс и Џонсон Мети кои отворија свои капацитети уште пред светската економска криза. „Значајно е да истакнам дека по најновото економско закрепнување, во последните четири месеци во Македонија има своевиден мини инвестициски циклус, при кој што Џонсон Контролс отвора уште една втора фабрика, а влегоа и инвестициите на Текнохозе од Италија, Кемет Електроникс од САД, Протек Груп од Русија и Мадерсон Груп од Италија“, истакна македонскиот премиер. Тој ги спомена и трите технолошко- индустриски развојни зони во Штип, Тетово и во Скопје.

Македонската Влада им нуди на британските бизнисмени, ако дојдат, ослободување од данок на добивка и персонален данок на доход за првите десет години од работењето. Други поволности се даночно ослободување на нераспределената добивка, ослободување од ДДВ, царина и акцизи за промет на добра кои се користат за производство наменето за извоз, како и ослободување од комунални и административни такси. „Во зависност од висината на инвестицијата, Владата може да учествува во трошоците за изградба на градежен објект до 500.000 евра“, рече Груевски.

На инвестицискиот форум присуствуваа претставници на околу 150 британски компании. Покрај Груевски, обраќања имале и вицепремиерот Владимир Пешевски, министерот за економија Ваљон Сарачини, министерот за странски инвестиции Веле Самак.

Груевски во Лондон се сретнал и со потпретседателот на Европската банка за обнова и развој Јан Фишер. (С.К.)