Поглед

Кој пишува капитални дела

Билјана Јовановска

Да не беше реакцијата на албанските партии на делови од Македонската енциклопедија на МАНУ, за волја на вистината, не ќе дознаевме кој, како и од каде ги пишувал или ги препишувал спорните определници.

Деновиве, по повеќе прозивки, се огласи професорката Татјана Петрушевска од скопскиот Правен факултет да ни го објасни својот удел во овој проект, за кој добила пристоен хонорар.

И, онака, директно призна дека спорниот дел во кој посочува дека американски и британски офицери ги обучувале припадниците на ОНА во конфликтот во 2001 година, го презела или го препишала, како сакате, од енциклопедијата Википедија.

Професорката сакала да испровоцира дебата, иако енциклопедиите треба да изнесуваат факти. По ова не ни останува ништо друго туку да се замислиме кој се' не ги пишува капиталните дела, како фамозната Македонска енциклопедија на МАНУ.

Допрва ќе откриваме што уште ли има во другите определници. Можно ли е еден универзитетски професор да користи податоци од Википедија, за која сите знаат дека до пред еден месец слободно можеше во неа да се внесуваат содржини без уредувачка редактура.

Што да се каже друго освен дека кај нас се' е можно, дури и аматерски пристап во пишувањето национални енциклопедии, зад кои, фрапантно ама вистинито, стои највисоката научна институција во државата.

Се пишува без пардон и свест дека таквите „факти“ влијаат на имиџот на Македонија, па, конечно, и на односот на другите кон нас.

Зарем е наивна работа што за определницата на професорката реагираа амбасадите на САД и на Велика Британија? Универзитетско-академски резил.