Арифи: Извештајот на Европската Комисија е позитивен




Опозицијата препознава два различни става во Владата за евроатлантското интегрирање на Македонија

Извештајот на ЕК е позитивен пред се поради фактот што ја повторува препораката за почнување на преговори. Тој е битна ориентација за нас како држава за тоа како треба да се насочуваме во однос на реформите и приоритетите во однос на ЕУ, оцени вицепремиерот Теута Арифи, на денешната седница на Национален совет за евроинтеграции на која се расправаше за Извештајот на Европската комисија за напредокот на Република Македонија за 2011 година.

Тој е битна ориентација за нас како држава за тоа како треба да се насочуваме во однос на реформите и приоритетите во однос на ЕУ, истакна Арифи, на денешната седница на Национален совет за евроинтеграции на која се расправаше за Извештајот на Европската комисија за напредокот на Република Македонија за 2011 година.

Осврнувајќи се на повеќе делови од Извештајот, политички и економски, таа потенцира дека многу е важно брзо да се пристапи кон конкретно адресирање на сите прашања кои се нотирани во него. Во заклучна фаза, информира Арифи, е вториот Акционен план во кој се дадени ��адачите кои имаат рок за реализирање до крајот на мај 2012, а до средината на декември ќе биде завршена и новата Национална програма за идната година.

- Ќе успееме како земја со добра волја, очекувајќи добра волја и од Атина да го надминеме проблематичниот спор, кој за жал, меѓу другото ги држи блокирани нашите евроатлантски процеси, рече вицепремиерот Арифи.

Потпретседателот на СДСМ, Гордан Георгиев, го нарече Груевски најголем евроскептик и побара од пратениците на ВМРО-ДПМНЕ да го сменат од премиерската функција. “Груевски призна дека не знае каде оди бродот наречен Република Македонија. Во едно интервју призна дека е слаб и дека нема што да правиме. Сите што ќе влезат во националистичката логика на премиерот ќе имаат одговорност дека не го препознале ова драматично признание“, рече Георгиев.

Претседателката на Советот, Радмила Шеќеринска, посочи на два спротивни става во владејачката коалиција: Од една страна премиерот Груевски, како претставник на ВМРО-ДПМНЕ, вели дека заклучоците на ЕК не се објективни, а од друга страна вицепремиерката за евроинтеграции од ДУИ, Теута Арифи, тврди дека извештајот е реална слика на состојбите. „Се плашам како ќе го решава Владата ова прашање, кога нема единствена позиција за него“, рече Шекеринска.

Според Антонио Милошоски, со самото тоа што во Извештајот по трет пат се повторува препораката за почнување на преговорите за членство, го верификува капацитетот на Република Македонија, институционален и политички, за нејзината зрелост да ги почне преговорите за членство. Милошоски повика Националниот совет со заклучок да ја повика ЕК во рамки на европските принципи да има пристап кој ќе значи должно почитување на културните, политичките, јазичните и другите различности во Македонија, а првенствено на употребата на придавката македонски.

- Самата мотивација за реформи треба да бидеме свесни дека не зависи само од ентузијазмот во Македонија, ниту пак само од надлежноста и мотивацијата што доаѓа од Владата. Тој ентузијазам и мотивација треба да се зема од двете страни и да се дава дополнтиелна енергија и од самата ЕУ, рече меѓу другото Милошоски, додавајќи оти уште во 2009 година Македонија го испорача односно ги пресретна политичките критериуми кои се неопходниот минимум за почнување преговори за ченство во ЕУ. Свесни сме, подвлече тој, дека проблемот создаден од грција е главната пречка, но цениме, рече, таа пречка не би требало до бесконечност да го држи во заложништво процесот на интегрирање на Република Македонија.