Пет Метини направи вистинско шоу




Со концертот на гитарската џез-ѕвезда, Пет Метини, се затвори годинашното, јубилејно издание на „Скопскиот џез-фестивал“

Тина Иванова

Триесеттиот јубилеен „Скопски џез-фестивал“ почна брилијантно, а така и заврши. Големата, една од најголемите ѕвезди всушност, во современата историја на џез-музиката, американскиот гитарист и композитор Пет Метини, дојде во Скопје. Беше долгопобаруван од овдешните познавачи и љубители на џезот, но уште повеќе од пошироката публика, да го видат и слушнат ова големо име на нашата сцена. И очекувано, заедно со врвните современи џезери од средната генерација уметници, Лери Гренадие на контрабас и Бил Стјуарт на тапани, Пет Метини воодушеви пред преполна Универзална завчера, затворајќи го годинашното издание на фестивалот кој во петте официјални и двете предфестивалски вечери донесе извонредни џез-артисти и состави. Ова, може да се каже, беше едно од најдобрите фестивалски изданија во последните негови 10 години. Во Скопје ги видовме џез-големците Вејн Шортер, Чарлс Лојд, Мирослав Витоуш, Нилс Петер Молваер, Виџеј Ајер, Роско Мичел..., и еве, завчера и Пет Метини. Дел од нив, веќе одамна го заслужија култниот статус на светската џез-сцена.

Пет Метини направи перфектно шоу. Тој донесе енергија и флуид што силно се рефлектираа кај публиката и постигна извонредна комуникација со неа, што на ретко кој музичар му успева. Но, кај Метини токму во тоа е вештината. Да ја привлече публиката таа да навлезе во неговото „сценарио“ до тој степен за да се почувствува како да е на сцената заедно со него и со неговата музичка дружина. Едноставно, заедно да дишат. Како што и самиот кажа, бидејќи првпат е во Скопје, се потрудил да направи листа на композиции кои на некој начин ќе го опфатат досегашното негово творечко искуство. Значи, се потруди да не „извози“ низ повеќе расположенија, низ повеќе музички интереси по кои е препознатлив, миксајќи ги енергичните теми со балади, или пост-боп, фјужн, латино џез, па и авангардата, редејќи всушност, цела лепеза од мелодии и разновидни стилови што практично, е дел од неговиот имиџ по кој светот го препознава. А, светот го препознава, тоа го покажа и во Скопје, и по неговата невидена мајсторија на свирење на гитара, таква каква што претставија и Гренадие и Стјуард, двајцата врвни инструменталисти кои се инспирација, кои навистина поттикнуваат и возбудуваат. Особено Гренадие кој буквално везеше на својот контрабас. Пет Метини својата креативност на сцената, не ја покажува во импровизацијата толку, колку што таа е насочена кон истакнувањето на техничките капацитети негови, а со тоа и на самиот инструмент. Но, токму тоа ја интригира публиката која бендот го наградуваше со аплаузи и овации на секое нивно земање на здив. Особено во миговите кога тројцата се истакнуваа и како солисти.

Пет Метини во Скопје го донесе инструментот-робот наречен „Оркестрион“ кој тој самиот го конструирал, а кој е составен од неколку инструменти, како пијано, маримба, вибрафон, разни удиралки. Огромен е и ја заземаше скоро цела површина на сцената. Тоа, всушност, го претставуваше на некој начин вториот сегмент од концертот, кој беше помирен, по релаксиран. Метини овој инструмент го движеше со својата гитара, тој е мошне интересен како конструкција, како иновација, но и како спој на современите тенденции со акустиката. Навистина наликуваше на некаков робот како што веќе го нарекоа.

Пет Метини со Гренадие и Стјуарт беше вистинскиот избор за завршница на јубилејното издание на „Скопскиот џез-фестивал“. Овие тројца музички магови донесоа многу возбуда, но и врвен професионализам што ретко го гледаме на нашата концертна сцена. Нивната „свирка“ беше поинаква димензија, беше перфекција, и нема да се заборави уште долго.