Гадафи погребан на тајна локација во либиската пустина




Поранешниот либиски лидер Моамер Гадафи денеска пред изгрејсонце беше погребан на тајно место во либиската пустина, јави арапската телевизија „Ал Џазира“

Претставник на Преодниот национален совет вчера соопшти дека Гадафи ќе биде погребан денеска со скромна церемонија, во присуство на исламски духовници. - Тоа ќе се случи на тајна локација во пустината, рече претставникот на ПНС.

Тој додаде дека погребот ќе биде извршен, бидејќи телото веќе се распаѓа. - Не е постигнат договор неговото племе да ги земе посмртните останки, додаде претставникот на ПНС.

Телевизијата „Ал Џезира“ истакнува дека телото на Гадафи неколку дена стоеше во Мисрата, додека новите либиски власти размислуваа што да прават со него.

Синоќа телата на Моамер Гадафи, на неговиот син Мутасим и на поранешниот командант на вооружените сили, биле изнесени од ладилникот во Мисрата и пренесени на непознатото место, соопштија британските медиуми. Либиски извор во Мисрата потврди дека телата се изнесени, но одби да открие какви и да било детали за тоа.

Според претставникот на ПНС, другиот син на Гадафи, Сеиф ��л Ислам, е во пустински регион, што се граничи со Нигер и Алжир, и се подготвува да избега од Либија со фалсификуван пасош.

- Тој е во триаголникот на границата на Либија со Алжир и Нигер, во регионот Гат. Се здобил со фалсификуван либиски пасош, рече претставникот на ПНС.

Тој додаде дека во подготовката за бегството на Сеиф ал Ислам учествувал и поранешниот шеф на разузнавањето на соборениот режим Абдула ас Сенуси.

- На југ се фатени сателитски телефонски комуникации. Абдула ас Сенуси е во граничниот регион, за да го организира бегството. Извор од разузнавањето на соседна земја, исто така, ни даде информација за тоа, рече претставникот на ПНС.

Тој кажа дека ќе биде тешко да се следи движењето на Сеиф ал Ислам и да му се попречи напуштањето на Либија.