Најмалку 366 загинати и 1.301 повредени во земјотресот во Турција




Во земјотересот со интензитет од 7,2 степени според Рихтеровата скала, што во неделата го погоди округот Ван во југоисточниот дел на Турција се урнале вкупно 2.262 објекти, соопшти Службата за справување од елементарни непогоди.

При земјотресот што во неделата го погоди реонот на градот Ван во југоисточниот дел на Турција, според најновите податоци загинаа најмалку 366 лица, а 1.301 се повредени, соопшти денеска турска Служба за справување со последиците од елементарни непогоди.

Според Службата, при земјотересот со интензитет од 7,2 степени според Рихтеровата скала, во округот Ван се урнале вкупно 2.262 објекти.

Спасувачките екипи и денеска продолжуваат со потрага по жртви и преживеани под урнатините на зградите. Спасувачите првенствено се сконцентирани на местата Ван и Ерчис, иако се стравува дека стотици лица останале затрупани под урнатините во трошните куќи во одалечените селски региони.

Турските медиуми јавуваат дека очајни преживеани граѓани заробени под куповите бетон и метал, молат за помош, а некои од нив со мобилни телефони им се јавуваат на семејствата и пријателите дека се живи.

Во земјотресот повеќе илјади луѓе ги загубија своите домови и беа присилени втора вечер по ред да останат под отворено небо и покрај студеното време.

Организацијата на Црвената полумесечина обезбеди 500 шатори само за градот Ерчис, каде градскиот стадион е претворен во огромна полска болница.

Во спасувачките акции учествуваат 2.400 екипи од 45 градови, а во регионот се испратени и 200 амбулантски возила.

Неделниот потрес беше најсилниот земјотрес што ја погоди Турција во последнава деценија.