Попоски до Филе: Бришењето на придавката „македонски“ да не се повтори!




„Македонскиот идентитет е чувствително прашање и очекувано изоставувањето на придавката „македонски“предизвика лавина реакции кај македонската јавност“, му рекол Попоску на Филе, за време на неговата посета на Европскиот парламент.

Изоставувањето на придавката „македонски“ од извештајот на Европската комисија за напредокот на Македонија повеќе да не се повтори, порачал денеска во Стразбур шефот на македонската дипломатија, Никола Попоски, на средбата со еврокомесарот за проширување Штефан Филе.

Ова барање од Филе, како што објавија некои медиуми, Попоски го поткрепил со фактот дека во официјалните регистри на Обединетите Нации стои „македонски јазик“ и „македонски граѓани“. Средбата се одржа во Стразбур каде се одржува заседание на Европскиот парламент.

„Македонскиот идентитет е чувствително прашање и очекувано изоставувањето на придавката „македонски“предизвика лавина реакции кај македонската јавност“, му рекол Попоску на Филе, за време на неговата посета на Европскиот парламент.

Министерот Попоски, сепак, упатил благодарност до Комисијата за обновената, по трет пат препорака за почеток на пристапните преговори со Република Македонија, како и за континуираната поддршка во спроведувањето на реформите за интеграција на земјата во ЕУ.

Комесарот Филе, соопшти македонското МНР, истакнал дека обновената препорака за почеток на преговорите ја отсликува и потврдува работата на македонската Влада во изминатата година. Посочил оти Комисијата е подготвена да работи заедно со Владата на Македонија за надминување на предизвиците кои се наведени во последниот Извештај на Комисијата за напредокот на земјата во евроинтегративните процеси.

Попоски во Стразбур имаше одделни средби со претседателите на двете најголеми политички групи во Европскиот парламент, Жозеф Дол од Европската народна партија и Мартин Шулц од Прогресивната алијанса на социјалистите и демократите кој е кандидат за претседател на ЕП. Притоа побарал отворена поддршка за неодложно почнување на пристапните преговори на Македонија со Унијата, како и поддршка на македонскиот евроинтеграциски процес, меѓу другото и во контекст на подготовката на Резолуцијата на Европскиот парламент за напредокот на Македонија во 2011.

На средбите е истакнато дека почитувањето на европските правила и вредности, но и конструктивноста и чувството за заеднички европски интерес е потребно да се промовираат како од земјите кандидати така и од сите земји членки на ЕУ, особено во кризни периоди, се вели во соопштението.