25.10.2011, 11:24 Ламерс: Расте притисокот врз Македонија за НАТО
„Сакаме спорот за името да се реши пред Македонија да стане членка на НАТО. Се потпираме на напорите и разговорите кои ги модерираат ОН“, вели претседателот на Парламентарното собрание на НАТО и член на германскиот Бундестаг.
„Членството на Македонија во НАТО ќе има големо значење и за неа, но и за Алијансата. Наспроти целиот ангажман, меѓутоа, факт е дека членството во НАТО и натаму за Македонија е „замрзнато“ поради нерешениот спор за името“, вели за радио Дојче Веле, Карл Ламерс, претседател на Парламентарното собрание на НАТО и член на германскиот Бундестаг.
„Условите се јасни. Сакаме спорот за името да се реши пред Македонија да стане членка на НАТО. Се потпираме на напорите и разговорите кои ги модерираат ОН“, вели Ламерс и дополнува оти клучот е во рацете на двете земји, односно дека Македонија и Грција мораат сами да придонесат за конечно решение на спорот.
Прашан дали доколку спорот не се реши до наредното проширување, Македонија на неопределен рок ќе остане пред вратата на НАТО, Ламерс одговара дека не верува во такво нешто и оценува оти е тешко да се определи временска рамка и конкретно да се каже.
- Но, сметам дека притисокот се зголемува. Расте желбата на НАТО и Европската унија оваа земја да се интегрира и да се прифати. Се надевам дека постоечкиот притисок води кон тоа. Преку Обединетите нации, преку Македонија и Грција да биде пронајден вистинскиот пат. Јас сум повеќе оптимист, отколку песимист, коментира Ламерс.
На прашањето дали е етички и во европски дух поканата да се условува и некому да се вети членството под услов да си го смени името, Ламерс вели дека има предуслови кои мора да се исполнат и се однесуваат на сите држави кои сакаат да станат дел од една меѓународна институција или организација како ЕУ и НАТО.
- Мора да се разбере дека сакаме земјата да ја прифатиме тогаш, кога постоечките проблеми ќе се надминат. Ова не се однесува само на Македонија, туку и на секој друг случај. Имаме предуслови кои мора да се исполнат и се однесуваат на сите држави кои сакаат да станат дел од една меѓународна институција или организација како ЕУ и НАТО. Сега во прашање е нерешениот спор околу името. Разбирливо е што не се сака кавгата да се внесе во организацијата на НАТО. Затоа ќе повторам: се надевам и посакувам проблемот скоро да се реши, со што Македонија со раширени раце ќе биде прифатена и вклучена во НАТО, изјави Ламерс.
Според него, расположението кон Македонија во Парламентарното собрание на НАТО е мошне позитивно и се ценат напорите што ги вложува земјата во реализирање на вредностите на Алијансата.
- Сто и шеесет македонски војници се во ИСАФ, ги има и во ЕУ-операцијата АЛТЕА, во УНИФИЛ. Вкупно 190 војници се во различни меѓународни мировни мисии и ваквиот ангажман се почитува. Затоа и во 2009 во Букурешт Македонија доби јасна перспектива за членство. Сега се чека само решението на спорот со името. Ќе се радуваме Македонија скоро да стане членка на НАТО. Таа може многу да придонесе за поголема стабилност во регионот, нагласува Карл Ламерс, претседател на Парламентарното собрание на НАТО и член на германскиот Бундестаг.
|
