26.10.2011, 13:30 Вардар про остави впечаток, но и бодови
Црвено-црните загубија од Кроација осигурување во Загреб со 36:31 за втор пораз во седмиот меч во регионалната ракометна СЕХА лига.
Вардар про остави добар впечаток во дуелот кај Кроација осигурување, но бодовите останаа во Загреб. Конечни 36:31 за домашниот тим (полувреме 17:15) за втор пораз на црвено-црните во регионалната ракометна СЕХА лига. Хорват со 6 гола и Копљар со 5 беа најефикасни играчи во победничкиот тим, со седумте погодоци нашиот Филип Лазаров беше прв стрелец во натпреварот.
И најмалата дилема за победникот беше отстранета во второто полувреме. Клучниот момент беше влегувањето во игра на Ивано Балиќ со кого Кроација осигурување обезбеди плус 6 (24:18), што рутински го одржа до крајот.
„Без оглед на нашите желби да оставиме добар впечаток или можеби да го изненадиме Загреб, сепак, тоа не беше реално“, изјави вардаровиот стратег, Веселин Вујовиќ.
Според него, на Вардар му недостасува малку цврстина, но порачува дека ќе се работи на тоа во наредниот период.
„Имаме многу нови играчи. Зад нас е само два и пол месеца работа. Не е едноставно да се сложат коцките за така мал период, но имаме квалитет“, дополни Вујовиќ кој откри дека ��ардар про се врти кон пласман на Фајнал фор во СЕХА лига како цел по елиминацијата во второто коло во купот на ЕХФ од Извиѓач од Љубушки, БиХ.
Кроација Осигурување Загреб - Вардар Про 36:31
Полувреме: 17:15. Сала: „Кутија Шибица“ во Загреб. Гледачи: 500. Судии: Панџа и Шаторџија од БиХ. Седмерци: Кроација осигурување Загреб - 4/6, Вардар про - 4/8. Исклучувања: Кроација осигурување Загреб - 12 минути, Вардар про - 6 минути.
Кроација Осигурување Загреб: Шего (10 одбрани, 1 седмерец), Пешиќ (1 одбрана, 2 седмерца), Брозовиќ 2, Вукиќ 1, Л. Шпрем 1, Хорват 6, Матулиќ 4, Мариќ 2, Гал 3, Копљар 5, Степанчиќ 3, Валчиќ 3, Гојун, Шпилер 2, Балиќ 1, Ј. Валчиќ 3. Тренер: Ивица Обрван.
Вардар Про: Абаџиќ (6 одбрани, 1 седмерец), Чаневски (5 одбрани), Стоилов 3, Ојлески 2, Н. Маркоски 1, Николиќ 2, Симовиќ 4, Додер 2, Вујовиќ 1, Собол 3, Петриќ 4, Јовчевски 2, Ф. Лазаров 7, Георгиевски, Абутовиќ, Анѓеловски. Тренер: Веселин Вујовиќ.
|
