И по 9. коло хитот во шпанската Примера, екипата на Леванте ја задржа првата позиција на табелата со победата од 3:2 над Реал Сосиедад.
Фудбалерите на Леванте пред ова коло беа во серија од шест победи, а лошо започна мечот за нив откако Естрада погоди за водство од 1:0 на гостите од Сосиедад.
По десет минути игра во вториот дел изедначи Нано, а за целосен пресврт се погрижи Валдо во 61. минута. Мартинез во 86. минута најави прекинување на успешниот низ на домаќините и изедначи на 2:2, но јунак на Леванте беше Суарез, кој во третата минута од судиското продолжение постигна погодок од слободен удар за нова победа и останување на првото место со 23 бода.
Реал Мадрид уште во првото полувреме го реши победникот во дуелот со Виљареал (3:0) со погодоците на Бензема, Кака и Ди Марија.
Рајо Ваљекано му го нанесе вториот пораз по ред на тимот на Малага, совладувајќи го со 2:0. Домашните фудбалери поведоа уште во 6. минута со голот на Ботелјо, а Малага остана со фудбалер помалку по исклучувањето на Елисеу во 34.минута, што им ја олесни задачата на домаќините кои со погодокот на Тамудо во 71.минута ги освоија трите бода.
Жорди Алба постигна гол во 82.минута за минимална победа на Валенсија на гостувањето против Сарагоса.
