Несекојдневно звучно патување со култниот „Метрополис“




„Метрополис“ на Фриц Ланг беше прикажан со жива музичка изведба од Македонската филхармонија и диригентот Хелмут Имиг, што и Скопје стана дел од европската и светска премиера на едно од најзначајните филмски остварувања.

Фото: Киро Попов

По премиерата во Њујорк, Берлин, Франкфурт и Загреб, култното научнофантастично филмско остварување на германскиот визионер Фриц Ланг, „Метрополис“, целосно реставриран во неговата оригинална верзија од 1927 година, дојде и во Скопје. И македонската публика, претежно љубителите на филмот и на музиката, беа сведоци на едно несекојдневно доживување. Завчера во Македонската опера и балет, футуристичкото дело на Ланг беше изведено со жива музичка придружба од страна на оркестарот на Македонската филхармонија, практика што кај нас за првпат се реализира. Аудио-визуелниот настан се одвиваше под диригентство на маестро Хелмут Имиг од Германија, човекот кој застанал зад пултот при изведбата и на оригиналната партитура на авторот на музиката, Голфрид Хуперц, како и на реставрираната на Франк Штробел.

Одлична беше идејата Светскиот ден за заштита на аудиовизуелното наследство, 27 Октомври, да се одбележи токму со прикажување на големиот германски класик, немиот филм „Метропилс“, кој е влезен во историјата на филмската уметност како едно од најзначајните остварувања во оваа сфера воопшто. Но, уште поважно е што музиката одеше во живо, што е иновација и прогрес, но и фаќање на чекор со европските и светските тенденции не само за развојот на Македонската филхармонија како институција, туку и за целокупната културна мапа на нашите простори.

Филмот „Метрополис“ им е познат особено на љубителите на филмот, и тој завчера пред полната сала на МОБ беше прикажан во оригиналната, 145 минутна верзија, што е сосема ретка и ексклузивна можност. Оркестарот на Филхармонијата и пријде на музиката мошне темелно, па звучеше, и особено продукциски, одлично. Благодарение и на исклучителниот диригент Хелмут Имиг, бевме сведоци на извонредно дво и пол часовно патување со експресионистичките слики на Ланг. Особено, што нималку не е лесна музичката партитура за изведба, таа е комплексна, полна со драматични пресеци, и е мошне долга. Но, музичарите на Македонската филхармонија успешно се справија, вложија огромен напор, стекнувајќи ретко исксуство кое се надеваме, ќе го продолжат и во иднина.

Само да потсетиме, филмот на Ланг во 2001 година беше реставриран, а целосно комплетиран во 2008, кога беше пронајден и последниот 30 минутен дел во архивата на Буенос Аирес. Тогаш во Германија, филмот се прикажа со жива оркестарска изведба и предизвика огромно интересирање и сензација.