(ФОТОГАЛЕРИЈА) „Универзална сала“ со песна го прослави 45. роденден




Оперскиот пејач Борис Трајанов, шоуменот Игор Џамбазов, триото „Тавитјан“, Есма Реџепова-Теодосиевска, хорот „Златно славејче“, Драган Мијалковски, Каролина Гочева, Калиопи, Виолета Томовска, Ансамблот за народни игри и песни на Македонија „Танец“, гостинката Тереза Кесовија... придонесоа за убавата славеничка атмосфера.

Фото: Петр Стојановски

Создадена како резултат на хуманоста на повеќе од 20 земји по катастрофалниот земјотрес што го погоди Скопје во 1963 година, центарот за организирање приредби „Универзална сала - Скопје“ завчера го прослави 45. роденден. Прославата се одржа под мотото „Универзална тогаш, сега и засекогаш“, а на неа покрај прикажувањето на специјално подготвениот документарен филм (од архивата на МТВ), во чест на големиот јубилеј, настапија и повеќе музички имиња, кои во изминатите години настапувале на сцената на „Универзална сала“.

Оперскиот пејач Борис Трајанов, шоуменот Игор Џамбазов, триото „Тавитјан“, Есма Реџепова-Теодосиевска, хорот „Златно славејче“, Драган Мијалковски, Каролина Гочева, Калиопи, Виолета Томовска, Ансамблот за народни игри и песни на Македонија „Танец“, гостинката Тереза Кесовија... придонесоа за убавата славеничка атмосфера. Во холот на „Универзална сала“ беше подготвена и изложба на стари фотографии и пропагандни материјали од настаните што се одржале во изминатите 45 години, која ќе трае и наредната недела.

„Универзалната сала“ има капацитет од 1.568 седишта, а официјално функционира од 1 јануари 1966 година. Бројките говорат дека во изминатите години во неа се одиграле повеќе од 300 театарски претстави, проследени од 250.000 публика, 17 мјузикли и 60 оперски претстави проследени од околу 75.000 љубители на музиката. Одржани се повеќе од 170 џез-концерти, 74 балетски претстави, 35 концерти на етномузика, над 150 концерти од областа на сериозната музика, околу 100 хуманитарни претстави, над 600 концерти и од забавната и од народната музика, како и 970 претстави и концерти за деца.

Четириесет и пет години по пуштањето во употреба, „Универзална сала“ изгледа потполно исто и се' уште чека на почетокот на долгонајавуваната реконструкција.