Мијатовиќ: Има подготвеност за подобрување на состојбата во медиумите




„Крајно време е сопствениците на медиумите и новинарите да разберат дека и служат на јавноста, а не на политичарите и на бизнис интересите“

Правната регулатива, реформи во јавниот дифузен сервис и Советот за радиодифузија, сопственоста на медимите и нејзината транспарентност, како и концентрацијата на медиуми, декриминализацијата на клеветата и поголемо единство меѓу новинарите.

Ова се прашањата во фокусот на разговорите кои ги водеше Дуња Мијатовиќ, претставник на ОБСЕ за слобода на медиумите на средбите со премиерот Никола Груевски, вицепремиерот Tеута Арифи, шефот на дипломатијата Никола Попоски и претседателите на ЗНМ, на Синдикатот на новинари и медиумки работници и на Советот за радиодифузија, Насер Селмани, Тамара Чаусидис и Зоран Стефановски.

Мијатовиќ потенцирајќи дека на сите средби била изразена подготвеност за соработка за подобрување на состојбата во медиумите и новинарите, подвлече оти е оптимист дека ќе се подобрува ситуацијата во посочените сфери.

- Крајно време е сопствениците на медиумите и новинарите да разберат дек�� и служат на јавноста, а не на политичарите и на бизнис интересите. Време е да го вратите дигнитетот на вашата професија. Новинарите не треба да се делат по основ на нивните политички интереси, затоа што поларизацијата е деструктивна за општеството, е пораката што ја упати Мијатовиќ на денешната прес - конференција.

Политичарите, апелира, не треба да им кажуваат како да си ја вршат работата, но и да се потсетуваат дека медиумите не се нивна сопственост. Треба, рече таа, политичарите да покажат поглема толеранција за новинарските прашања.

- Тука сум да помогнам, во рамки на надлежностите од мојот мандат. Но, нема да се воздржувам јасно и гласно да укажам на проблемите и да критикувам ако видам дека нема каков било позитивен исчекор, истакна Мијатовиќ.

На новинарско прашање дали ОБСЕ има механизам да изврши притисок доколку нема евидентни промени во состојбите со медиумите и новинарството, таа потенцира дека располага со демократски инструменти за реакција, а нејзината најсилна алатка, подвлече, како претставник на организацијата во која се 56 земји, е нејзиниот „глас“. Смета дека е неприфатлива каква било репресија за медиумската слобода во општествата.

Таа ја поздрави иницијативата на вицепремиерот Арифи за соработка со медиумите и нивни претставници, за што, информираше, во рамки на акциониот план, ќе работат и претставници на ОБСЕ. Најави дека наскоро од нејзината канцеларија ќе биде испратена до сите заинтересирани правна анализа на кривичниот законик и на останатите документи поврзани со декриминализација на клевета, заедно со препораки.