27.10.2011, 14:51 Пратениците расправаат за Извештајот на ЕК
Собранието на денешната седница продолжи со разгледување на Извештајот на Европската комисија за напредокот на Република Македонија за 2011 година.
Како да се убеди Европскиот совет во декември да даде датум за преговори за влез на Република Македонија во Европската унија, смета пратеничката Силвана Бонева од ВМРО-ДПМНЕ, треба да им биде приоритет на пратениците во следниот период.
Според пратеникот Малиша Станковиќ од Социјалистичката партија на Македонија, 90 отсто од сите забелешки во изминатите две години, во овогодинешниот извештај ги нема.
- Тоа значи дека некој во минатите години работел, а не седел со скрстени раце, но сепак треба да упатиме порака дека извештајот не беше доволно коректен, додаде Станковиќ.
Пратеникот од ДПА Беким Фазлиу побара присуство на владин претставник на денешната седница, или, како што посочи, присуство на вицепремиерот за европски интеграции Теута Арифи за да каже како да се надминат проблемите наведени во Извештајот од ЕК.
Талат Џафери од ДУИ рече дека вицепремиерката Арифи поради здравствени причини не можела да присуствува на седницата и навремено ги информирала пратениците за тоа, �� пратеникот Фазлиу политички ја злоупотребувал собраниската говорница.
- Ние ги поздравуваме позитивните работи искажани во Извештајот, но бараме одговорност од властите затоа што има работи во кои уназадуваме и сме полоши во однос на минатите години, рече пратеникот Стојко Пауновски од СДСМ.
Неговата сопартијка Светлана Мазгалоска-Вучетиќ, извештајот го оцени како негативен, ставајќи акцент на загрижувачката состојба со медиумите.
- Има реформи во судството, јавната администрација и борбата со корупцијата, но сето тоа е повеќе теоретски, а помалку на терен. Реформите се повеќе партизирани од реализирани, додаде Мазгалоска-Вучетиќ од СДСМ.
Косана Николиќ-Мазнева од ВМРО-ДПМНЕ рече дека била шокирана кога го видела извештајот, поради тоа што никаде не била наведена придавката „македонски“ и смета оти се врши силен притисок само врз едната страна, односно Република Македонија.
- Од тие причини се запрашав дали треба да се поддржи еден ваков извештај. Генерално, ако се направи анализа на сите три извештаи од изминатите години и од годинава ќе се заклучи дека се исклучително позитивни, а тоа значи дека реформите на Владата успешно се реализираат, истакна Николиќ-Мазнева.
Пратениците од опозицијата пред обраќањето на Николиќ-Мазнева ја напуштија собраниската седница, поради, како што велат, ниската комуникација со неа во изминатиот период и навреди од нејзина страна кон пратениците од СДСМ.
По едночасовната редовна попладневна пауза, дискусијата во Парламентот за Извештајот на ЕК ќе продолжи.
|
