Црвенковски: Не сум вечен, но останувам на чело на СДСМ



Црвенковски во интервју за „Дојче Веле“ на македонски јазик ја критикува севкупната политика на сегашната влада, оценувајќи дека земјата „продолжува да се движи во погрешен правец“

Не сум вечен, но останувам на чело на партијата до следниот конгрес, вели во интервју за Дојче веле на македонски јазик претседателот на опозицискиот СДСМ Бранко Црвенковски.

Тој тврди дека внатре во партијата се практикува демократија. Црвенковски во интервјуто ја критикува севкупната политика на сегашната влада, оценувајќи дека земјата „продолжува да се движи во погрешен правец“.

„Прво на планот на евроатланските интеграции, всушност кога ќе ги спомнеме како термин евроатланските интеграции ние зборуваме за иднината на земјата. Ние никогаш не сме биле подалеку од остварувањето на тие цели и посакувана иднина за најголемиот дел од граѓаните на Република Македонија. Влеговме по извештајот на Европската комисија изјавите, интервјуата на премиерот Груевски, во фаза на конфронтација со меѓународната заедница, пред сe со Европската унија, но би рекол и со Вашингтон.

Втора работа е на планот на економските политики, продолжува популизмот на оваа власт, продолжува политиката на погрешни приоритети. Македонија има лимитирани финансиски ресурси, но, и тие ги троши на погрешен начин, најчесто на непродуктивни проекти.

Трета работа е на планот на демократијата, уназадувањето станува сe повидливо. Не се почитуваат законите подеднакво за сите, правната држава е руинирана, слободата на јавно изразување е на најниски можни гранки во споредба со кој било период досега. Значи Македонија оди во погрешен правец и за жал она што морам да го констатирам, состојбите денес нечинат, но, ќе стануваат уште полоши“, вели Црвенковски.

Прашан за демократскиот капацитет на СДСМ како партија, Црвенковски со став:

„Јас ви тврдам дека и по начинот на дејствување и по статутарните одредби СДСМ е една од најдемократските партии во Македонија, во однос на ВМРО ДПМНЕ неспоредливо подемократска партија. Ќе ви дадам за пример неколку илустрации. Нашиот статус вели, и тој се почитува, дека ако за која било одлука една третина од членовите на органот не дадат поддршка, таа одлука не е донесена, ќе се разгледува повторно. Листите за кандидати на пратеници во себе содржеа само имиња предложени од страна на општинските организации, од базата. Централното раководство ја испочитува нивната волја. Во СДСМ има внатрешна демократија и тврдам дека тоа не е клучниот проблем, клучниот проблем е тоа што нема демократија во државата. Денес се соочуваме со еден недемократски режим и проблемот на оваа земја и на овој народ е како да се смени тоа, или преку притисок власта да ја корегира политиката или на крајот сите да заклучиме дека е неопходно да се смени самата власт“, вели Црвенковски.

Во врска со евентуални планови за негово повлекување од лидерското место во партијата, Црвенковски со одговор дека токму по неговото враќање дошло до консолидирање на СДСМ.

„Се разбира дека не сум вечен, ниту имам намера да останам вечно на оваа позиција. На конгресот во Битола веднаш по изборите на тајно гласање беше изгласана доверба не само за мене, туку и за органите на партијата, и ние ќе продолжиме да ја вршиме таа работа сe до следниот конгрес во мај 2013. Што се однесува до тезата во вашето прашање сакам да ве потсетам дека пет години јас не бев во партијата, бев претседател на државата, и тогаш власта, односно ВМРО ДПМНЕ наоѓаше милион причини да го критикува СДСМ и тоа беше период во кој се врзаа неколку последователни порази. Токму поради тие порази се вратив во партијата. На изборите во 2008 партијата освои 220 илјади гласа, на 5 јуни годинава СДСМ освои 370 илјади гласови. Тоа е сериозен напредок. Некој ќе рече недоволен, се согласувам не победивме. Меѓутоа за две години успеавме да ја кренеме партијата и да дојдеме до еден навистина завиден резултат кој говори дека курсот е во ред и дека треба да се продолжи со процесот на јакнење и консолидирање на партијата и подготовка за следните изборни соочувања“, вели Црвенковски во интервју за Дојче Веле на македонски јазик.