26.10.2011, 15:50 Предлог-законот за минимална плата влегува во владина процедура
Предлог-законот за минимална плата е усогласен од страна на трите социјални партнери и уште денеска ќе биде потпишан од министерот за труд и социјална политика и доставен до Владата.
Во текстот на Предлог-законот се содржани одредби со кои се утврдува правото на минимална плата, нејзината висина, органите надлежни за утврдување и објавување на минималната плата, како и инспекцискиот надзор. Дефиниран е поимот минимална плата, кој треба да биде износ на најниско месечно ниво на плата која работодавачот е должен да му ја исплати на работникот за извршена работа за полно работно време.
Министерот за труд и социјална политика Спиро Ристовски по денешната седница на Економско-социјален совет изјави дека во износот на минимална плата не се вклучени додатоците на плата кои дополнително ќе треба да му се исплатат на работникот.
- Минималната плата ќе се утврдува во процент и тоа во износ од 39,6 проценти од просечната плата остварена во бруто износ во претходната година. Ова значи дека минималната плата ќе ја следи динамиката на плати во земјата и истата ќе биде позната на крајот на годината за наредната година. Поради поголема транспарентност и достапност на податокот, таа ќе се објавува во Службен вес��ик на Република Македонија, рече Ристовски.
Тој додаде дека минимална плата за 2012 година веќе е договорена и ќе изнесува 8.050 денари во нето износ, односно 39,6 проценти од просечната плата за 2011 година.
За дејностите со пониски плати утврдена е динамика на усогласување во период од три години со цел да не се предизвикаат потешкотии во работењето на овие дејности.
- Предлог варијантата е и тука да се оди во проценти. Планот е да биде три години по една третина зголемувањето во соодветниот процент за да во 2015 година се добие утврдениот износ за сите гранки идентично, појасни Ристовски.
Во Предлог-законот утврдени се и прекршочни одредби и глоби кои ќе се движат од 6.000 до 7.000 евра во денарска противвредност за работадавачот доколку не ја исплати минималната плата и глоба во износ од 3.000 до 4.000 евра за директорот.
|
