28.10.2011, 14:11 Ладни радијатори - жешка цена, парното пак поскапува
Цената на парното греење од 1 ноември ќе скокне за 7,2 до 13,29 проценти, а ново поскапување следува по два месеца
Маја Томиќ
Додека граѓаните деновиве се' погласно реагираат незадоволни од ладните радијатори во домовите, и покрај почната грејна сезона, сега имаат уште една причина за нервоза. Од наредниот месец ќе плаќаат поскапо парно.
Новиот шок врз нивните џебови вчера им го соопшти Регулаторната комисија за енергетика, која им ги призна зголемените трошоци на производителите и на дистрибутерите на топлинска енергија. Така, од 1 ноември ова греење поскапува за 7,2 и за 9,6 проценти за корисниците на „Топлификација“ и за 13,29 проценти за корисниците на топланата „Скопје - север“. Новите цени ќе се однесуваат само за ноември и за декември годинава, а од јануари ќе имало нови пресметки и корекции на цените. Финалната одлука, односно точните проценти на поскапувањето кои ќе ги опредеи Комисијата, ќе се соопштат после редовната седница во понеделник.
Според моменталните пресметки, како што соопшти вчера претседателот на Регулаторна, Димитар Петров, домаќинствата кои плаќаат за греење 12 месеци од „Топлификација“ ќе добијат поголеми сметки за 7,2 проценти, а сметките за домаќинствата кои плаќаат за топлинска енергија само во грејната сезона ќе бидат повиоски за 9,6 проценти. Најдебели сметки ќе плаќаат корисниците на топланата „Скопје - север“ каде парното греење ќе биде поскапо за дури 13,29 отсто, иако најголем дел од барањата за исклучување досега се случија токму кај нив, поради незадоволството од услугите на „Топлификација“. Топлинските компании сакале и повеќе. Според барањата кои до РКЕ ги доставиле, „Топлификација“ побарала зголемување од околу 13 проценти, а „Скопје север“ за 15 проценти. На првичните пресметки кои ги соопшти Регулаторна по вчерашната подготвителна седница компаниите доставиле забелешки поради тоа што РКЕ ги вкалкулирала во сегашните пресметки нивните трошоци до јуни годинава, а кои биле во износ од 26 милиони денари.
Петров вчера појасни дека одлуката за поскапувањето на парното е како резултат на порастот на цената на природниот гас за 19,6 проценти во четвртиот квартал, што предизвикало зголемени трошоци во производството на топлинска енертгија. Всушност, тоа и беше посочено како причина од страна на скопските топлани кои неодамна поднесоа до РКЕ барање за зголемени трошоци, односно за покачување на цената.
Инаку, пртеходно парното поскапе во август годинава за 3,13 проценти и новата цена требаше да важи до крајот на годинава. Причината поради која тогаш се бараше нова цена беше зголемувањето на цената на гасот и на мазутот, како и неостварениот приход на компаниите и намалениот број на корисници. И на почетокот од годинава скопјани добија повисоки сметки за парно за 3,63 отсто. Поскапувањето важеше за корисниците приклучени на „Снабдување - исток“, Снабдување - запад“ и „Снабдување - центар“, додека за потрошувачите од „Скопје - север“ сметките тогаш беа намалени за околу 2,51 проценти.
|
