28.10.2011, 15:11 Саркози: Грција не беше подготвена за еврото
Францускиот претседател Никола Саркози изјави дека одобрувањето прием на Грција во Еврозоната во 2001 година било грешка. Тој рече дека Грција во тоа време не била подготвена. Но, додаде тој, можела да се спаси благодарение на завчерашниот договор на ЕУ за должничката криза во Еврозоната.
Како реакција, министерот за надворешни работи на Грција изјави за Би-Би-Си дека Атина не е изворот на кризата, и дека ниту една земја не треба да биде жртвено јагне.
Договорот постигнат во Брисел предизвика скок на акциите во светот.
Во ТВ-интервју во четвртокот, Саркози призна дека приемот на Грција во Еврозоната бил грешка бидејќи земјата влегла со лажни (економски) податоци и дека не била подготвена“. Тој додаде дека бил убеден дека актуелната грчка влада би излегла од кризата и дека договорот од средата спречил „катастрофа“. „Ако Грција не ги исполнеше паричните обврски, ќе имаше домино-ефект што ќе ги повлечеше сите“, рече Саркози.
Во изјава за Би-Би-Си, грчкиот министер за надворешни работи Ставрос Ламбринидис изјави: „Грција е во центарот на бурата, но таа не е изворот на проблемите со европскиот долг и со дефицитите. Тоа го забележуваме во Португалија, Ирска, Шпанија и Италија. Значи, не помага да се жртвува одредена земја кога се справувате со европски проблем“.
Договорот има за цел да се спречи ширење на кризата во економиите од пошироката Еврозона, но лидерите изјавија дека треба да се заврши многу работа.
Уредникот на Би-Би-Си за бизнис Роберт Пестон јави дека лидерите на ЕУ купиле малку време, а пазарите ќе покажат дека одлуката била корисна за неколку недели или месеци.
Клаус Реглинг, главен извршен претставник на ЕФСФ, вчера имаше разговори во Пекинг, додека Еврозоната продолжи со напорите да ја убеди Кина – и другите економии во развој – да и' помогнат да се спаси од парализирачката должничка криза. Аналитичарите изјавуваат дека можните кинески инвестиции би можеле да изнесуваат до 100 милијарди долари, јави дописникот на Би-Би-Си од Пекинг. Но, Кина бара гаранции од Европа дека нејзините инвестиции ќе бидат безбедни, јавува дописникот. (Би-Би-Си)
|
