28.10.2011, 14:58 Седум жртви во невремето во Италија
Бројот на жртвите од невремето во италијанските региони Лигурија и Тоскана се искачи на седум загинати, откако денеска е пронајдено телото на еден Романец.
Телото го откриле пожарникари во реонот на Боргето Варај, која е најтешко погодената област во Лигурија. Жртвата била во посета на свој пријател, кој исто така починал.
Според најновите податоци на спасувачките екипи, како исчезнати се водат уште седум лица.
Во текот на ноќта автопатот Џенова-Ливорно беше повторно пуштен во сообраќај во двата правци, откако четири дена беше затворен поради лизгање на земјиште.
На вонредната седница италијанската Влада денеска прогласи вонредна состојба во областите погодени од поројните дождови и реши да доддели 65 милиони евра помош.
Населението од погодените области се уште нема електрична енергија, гас и вода за пиење. Луѓето кои останаа во своите домови немаат греење, а многу од нив се привремено сместени во хотели.
Локалните власти евакуираа 250 лица од историскиот локалитет Мулацо, на околу 10 километри од Аула во северниот дел на Тоскана, поради опасност од лизгање на земјиштето. Областа Специлија, каде се наоѓа одморалиштето Чинкве Тере, како и населбите Монтеросо и Вернаца и понатаму се отсечени од светот.
Според метеоролозите, за неколку часа наврнале меѓу 200 и 500 милиметри дожд, што предизвика излевање на реките, а оштетени се и неколку мостови. Поројните дождови предизвикаа лизгање на земјиштето и реки од кал во неколку села.
|
