Бурно во скопскиот Совет околу улиците

Вчерашниот протест на опозицијата мина со скршено стакло и стотина граѓани

Деспина Трајковска



Само уште претседателот на СДСМ, Бранко Црвенковски, вчера не се појави пред бараките на Град Скопје да протестира за одлуката за преименување на улиците во главниот град, за која требаше да се гласа на седницата на Советот. Речиси целото партиско раководство на СДСМ, опозициски пратеници, советници по скопските општини, симпатизери, но и обични граѓани ја окупираа бараката на Советот на Скопје.

Со свирчиња во уста, тропање со пластични шишиња по бараката во која се одржуваше седницата, извикувајќи „Уа“, „Бугари“, „Предавници“, тие го искажаа својот револт од идејата за преименување на некои од улиците. За влакно беше избегнат посериозен инцидент откако некои од стотината собрани граѓани се втурнаа во бараката со желба да присуствуваат на седницата.

Поради присебноста на Игор Ивановски и Емилијан Станковиќ од СДСМ, како и благодарение на обезбедувањето на Град Скопје и на полицијата, протестот мина само со кошкање и едно искршено стакло на влезната врата, при што со мала повреда се здоби еден редар.

За разлика од надвор, пред бараката, внатре на седницата навидум имаше работна атмосфера. Тука им беше дозволено присуство како гости на најавените членови на СДСМ и претставниците на нејзината коалиција. Но, и таму за нецел час атмосферата зовре. Откако мнозинството на Советот не го прифати предлогот на опозицијата да се одложи точката за преименување на улиците, присутните гости и советниците со тропање на клупите и свирчиња оневозможија нормални услови за работа. Со надвикување од говорница, тие најавија дека ја напуштаат седницата, бидејќи не сакале да учествуваат во „срамниот чин кој ќе остане запишан со црни букви во историјата“.

„Оваа насилничка одлука на ВМРО-ДПМНЕ ќе трае само девет месеци, до следните локални избори. Нема потреба да ги менувате вашите лични исправи. СДСМ се обврзува да го ревидира и поништи ова преименување“, порача Софија Куновска, координаторка на СДСМ во Градскиот совет. „Денеска Коце Трајановски, Ирена Мишева и останатите советници на ВМРО-ДПМНЕ и нивната коалиција, по нарачка на Груевски, влегуваат во едно од најсрамните поглавја во поновата македонска историја. На подмолен начин сакаат да го избришат ликот и делото на оние што ги дале своите животи за нашата држава. Ова е историски геноцид“, дополни Куновска.

Таа пред Советот, образложувајќи го противењето на СДСМ за преименување на дел од улиците, даде забелешка за бришењето на името на Стив Наумов и именувањето на еден мост и улица со Тодор Александров. Искажа револт поради, како што рече, знакот на еднаквост помеѓу Гоце Делчев и Тодор Александров. Куновска посочи дека било бесрамно со името на првиот претседател на државава да се именува улица која се наоѓа на периферијата на Скопје.

„Ако некоја релевантна рецензија на состојбите со улиците утврди дека навистина постои потреба од ваква акција, потрудете се таа да ја завршиме во вистинска процедура, со вклучување експертска помош, на задоволство на граѓаните на кои ве избраа“, рече Куновска пред опозицијата да ја напушти седницата.

Кусо време потоа, без СДСМ, Советот ја усвои одлуката за преименување на дел од улиците. Беше усвоен и амандманот улицата „Ленинградска“ во иднина да го носи името на Стив Наумов.

За вчерашната ситуација реагираа и од владејачката партија. „Не се работи за ревидирање на историјата. Ќе се сменат имињата на оние улици кои не носат имиња на значајни личности и кои сега се обележани со бројки“, рече Александар Бичиклиски. На прашањето дали Тодор Александров треба да добие улица, тој посочи дека јавноста може да го прочита одговорот во научниот труд напишан од еден висок функционер на СДСМ.

Инаку, со усвојувањето на вчерашната одлука, мнозинството на Советот даде зелено светло во оваа фаза да се преименуваат 29 улици и два моста во Скопје. Така, по Тодор Александров, ќе се именуваат една улица и еден мост, каков што е случајот и со Мајка Тереза.