Реплики

Политички тестамент

Соња Крамарска

За дел од македонската јавност оваа своевидна исповед на премиерот, или дури и политички тестамент проследен со жесток напад кон ЕУ ќе и дејствува симпатично

Премиерот Груевски по втор пат во оваа година даде опширно интервју за државната информативна агенција МИА во која соопшти работи кои досега не сме ги слушнале или сме ги слушнале во поблага форма. За разлика од првото интервју кое го даде зимоска и беше на тема достигнувањата на Владата, сегашното интервју е на тема односите на Македонија со ЕУ. Поточно, односите во триаголникот Македонија - ЕУ- Грција, ситуација која ако внимателно се чита премиерското интервју, лесно може да се претвори во бермудски триаголник за Македонија.

Груевски, во тоа интервју го напаѓа Брисел за пристрасност кон Грција и кон другите балкански држави кои добија позитивни извештаи од Европската комисија, и меѓу редови наведува на заклучокот дека светот, односно Европа - не ја сакаат Македонија.

Има и други проблематични работи кои произлегуваат од интервјуто на Груевски. Тој директно и најотворено досега ја обвинува меѓународната заедница дека врши притисок врз Македонија и врз него како премиер, да постигне договор со Грција за ново име наместо уставното име на нашата земја. И не само тоа туку тврди дека Брисел ја уценува Македонија или да го смени името или догодина ќе ја загуби препораката за одредување датум за почеток на преговорите за членство во ЕУ.

Понатаму, македонскиот премиер изнесува и тврдење дека ЕУ работи на проект за негово омаловажување во очите на домашната јавност, со цел да го намали неговиот углед и влијание во политиката што ја води Скопје во врска со прашањето за името. Вели и дека и претходно добивал закани дека ќе почнат кампања против него, но сега тие почнале да се реализираат.

Со еден збор Груевски ја обвини Европската унија за водење на подземна политика кон Македонија и играње на заткулисни игри кои имаат за цел да доведат до смена на овдешната Влада, и донесување на власт некои други политичари со кои, вели тој, Брисел може полесно да се договара. Притоа, премиерот на заобиколен начин искажува и несигурност кон јавното мислење и на каде тоа може да се сврти доколку на референдум се постави прашањето за ново име на Македонија.

Во вториот дел од интервјуто, пак, што МИА го објави вчера како продолжение на првиот дел од понеделникот, премиерот Никола Груевски практично ја прогласува за пропадната стратегијата што ја наметнаа негови неофицијални советници и политички кругови блиски на владејачката десница - дека Грција под товарот на економските тешкотии ќе биде лесен плен за Македонија.

Како што и самиот наведува, нивните процени се покажале погрешни. Иако значително економски ослабена и со нарушен деловен и политички углед, на Грција светот се' уште и играл „пиперевка“ - прилично нејасен збор во македонскиот речник кој Груевски го користи за да каже дека и покрај економските тешкотии што се закануваат да ја урнат еврозоната нашиот јужен сосед се' уште е на врвот на приоритетите на ЕУ. Груевски сфатил и дека Европа на Грција гледа како на темпирана бомба во своите редови и оттука ќе стори се' таа да не биде активирана. И во таа битка за нејзин спас Македонија, како што алудира тој, е колатералната штета. Спорот за името, пак, според неговата анализа на севкупната ситуација никогаш нема да се реши по чесен пат или со име кое би ја задоволило Македонија, а бидејќи ние нема да прифатиме било какво решение - ќе останеме на маргините на Европа.

Груевски во ова интервју за првпат признава и дека е промашен потегот на македонскиот државен врв за поднесување на тужба пред Меѓународниот суд на правдата во Хаг. Бидејќи, вели тој, Грција и да добие пресуда која е во полза на македонската страна, таа нема да ја почитува. Праќа и една многу важна порака до Европа и до САД дека притисокот на кој е изложена неговата Влада во спорот за името, е веќе контрапродуктивен и ќе резултира со оддалечување а не со доближување на двете страни до решение.

И она што е најважно во ова интервју е што Груевски како да се помирил со одземање на препораката за датум за почеток на преговорите. Тој вели дека е штета ако се случи тоа, но дека македонската Влада со ништо не заслужила таква драконска казна и дека ќе се носи и со една таква претпоставена ситуација. Со еден збор, ќе загине ако треба, но херојски. Се убиваме од работа, вели тој, повикувајќи го на крајот и Бог на помош.

За дел од македонската јавност која е против смена на името и која се' уште доминира како мнозинска во државава, можеби оваа своевидна исповед на премиерот, или дури и политички тестамент проследен со жесток напад кон ЕУ ќе и дејствува симпатично. Таква шлаканица кон ЕУ може привремено и сите нам да ни годи, но сепак главното прашање е - каква корист има Македонија од таков настап и што ново или каков квалитет таквиот настап ќе донесе на планот на надворешната политика.

Премиерот е избран за да нуди решенија за присутните проблеми а не да си наоѓа оправдувања за нивното нерешавање. Со тоа интервју Груевски безмалку самиот си даде негативна оцена за неговите премиерски и лидерски достигнувања затоа што ја прикажа сопствената позиција како немоќна и губитничка кога се во прашање големите игри на моќните држави.

Владата, по ова интервју има многу поводи за анализа на својата политика кон Брисел и кон прашањето за името. На пример зошто се поведе по прогнозите дека економскиот пад на Грција ќе ги ослаби нејзините позиции во преговорите со Македонија. Зошто потроши две и пол години на меѓународен судски спор од кој нема да има корист туку само залудна надеж.

Најпосле - што сака да каже Груевски во ова интервју, дека треба да останеме и натаму на маргините на Европа и да плачеме оти светот нема разбирање за нашите интереси и за големината и важноста на македонската нација? Да, светот е суров, но треба да опстанеме. А од интервјуто на нашиот премиер не се гледаат знаци на оптимизам и подготвеност за тешки одлуки. Или давање на алтернативни правци за развој ако веќе за Европа, како што вели, Македонија е несакано дете.