Премиерот да дојде во парламентот

Парламентарниот опозициски блок го изрази своето незадоволство од ставовите на Груевски во интервјуто за МИА

Опозициски парламентарен блок во отвореното писмо до премиерот Никола Груевски изрази длабоката загриженост и несогласување со неговите ставови искажани во интервјуто за МИА.

"Интервјуто покажува една агресивност и фрустрација поврзана со македонските евроатлантски интеграции кои се притоа непринципиелно подведени на Ваше лично разбирање, чувство и емоција", стои во директното обраќање на 42 пратеници од СДСМ, НСДП, ЛП, ПЕИ до премиерот.

"Колку и да имаме разбирање за Вашата лична немоќ која доаѓа од Вашето признание дека во Чикаго отидовме на однапред најавен и очекуван пораз, не може да преминеме преку еден очигледен факт: Односите со Европската Унија и НАТО не се ваша приватна работа и однос, и тие не можат и не смеат да бидат предмет на ваше емотивно толкување и нагон", му порачуваат парламентарците на Груевски.

Според нив, се додека тој е премиер, негова обврска и задача е да ги застапува и да работи во интерес на сите граѓани, кај кои, како што потенцираат, постои висок степен на консензус дека интеграциите се врвен стратешки приоритет за нашата земја.

"Вие сте платени од граѓаните тие интереси да ги остварите без оглед на Вашите лични убедувања и емоции. Проблемите не се нови. Со нив се соочуваа и вашите претходници и успеваа своите лични емоции да ги сочуваат за себе, а во преден план да ги стават државните и да испорачаат резултати во клучни моменти, како партнерство за мир, договорот за стабилизација и кандидатски статус. Оттаму прашуваме кој ви го даде правото во името на два милиони граѓани да ги расипувате односите со целата меѓународна заедница", се додава во писмото на пратениците кои бараат од премиерот и од претседателот да се обратат во Собранието, каде пред целата јавност ќе реферираат за официјалниот став на државниот врв, и за тоа кои се конкретните планови за евроатлантските интеграции на нашата земја по Самитот во Чикаго.