Грешки има и во Британика

Енциклопедија Британика, една од најпопуларните истражувачки алатки на денешницата, исто така, имала свои подеми и падови. Силниот критицизам кон оваа светска енциклопедија се развил кон нејзиното 11. од вкупно 15 изданија. Критиките, главно, ја обвинувале енциклопедијата за буржоаско и старомодно размислување за науката, уметноста и социјалните прашања. Најголема прашина се крена за омаловажувањето на работата на Зигмунд Фројд, а коментарите биле дека енциклопедијата не е одраз на тогашната генерација и атмосфера. Некои од критиките никогаш не биле прифатени, ниту биле извршени бараните корекции.

Критики има и кон последното во печатена верзија, 15. издание, и тоа за неконзистентност во некои од содржините и за негативно портретирање на хиндуизмот. Едно од поголемите промашувања по кои се памети Енциклопедија Британика е квалификацијата за познатото расистичко движење против Црнците во САД Кју Клукс клан - за кое контрибуторот напишал дека има функција на заштитник на белата раса и обновувач на редот и дисциплината на американскиот Југ по граѓанската војна.

Марија Кири, познатата двократна нобеловка за физика и за хемија, настрадала под налетот на сексизмот во Енциклопедија Британика, бидејќи и покрај своите научни достигнувања не „заработила“ место меѓу познатите и славните. Наместо тоа, Кири добила само два реда на крајот на биографијата на нејзиниот сопруг Пјер Кири.

Познатата светска енциклопедија била критикувана и за непрецизност или за неточност, па дури еден период едно од нејзините изданија предизвикало еден од критичарите да напише книга под наслов „Дезинформирање на нацијата“. „Њујорк тајмс“ во почетокот на минатиот век ја опишал Енциклопедија Британика како „плукачко четиво“. Имало и обвинувања дека е цензурирана од Римската католичка црква.

Во изминатите три години Енциклопедија Британика доживеала ревизија на 40 отсто од нејзините содржини. Нејзините он-лајн верзии се под постојани преправки се' со цел да бидат во тек со брзиот развој и менувањето на ситуациите. (С.К.)