Грозоморно убиство во Смоларе

Куќата во која се случило убиството

Триесет и петгодишна жена ја убила сосетката, удирајќи ја со тула по глава

Грозоморно убиство го потресе селото Смоларе. Триесет и петгодишната Маја С. ја убила својата 76-годишна сосетка Вера Цветанова, удирајќи ја со тула по глава. Жителите на село Смоларе се згрозени од убиството. Коментираат дека причината за суровото убиство биле нарушените односи меѓу двете сосетки.

Убиството се случи завчеравечер околу 20 часот во ходникот од куќата на сосетката Динка Н. (91). Со неа седела Вера, кога дошла Маја и со метална коса и бекатон-тула и' нанела смртни повреди во пределот на главата. Деведесет и едногодишната старица се обидела да ја спречи Маја, но не успеала. И таа била нападната при ш��о и' била нанесена повреда на десната рака во пределот на подлактицата и зглобот, по што успеала да се извлече и да избега кај соседите. Веднаш била алармирана полицијата која со истражен судија и заменик-јавен обвинител извршиле увид, а пристигнал и лекар кој ја потврдил смртта кај старицата.

Жителите на село Смоларе се згрозени од убиството и велат причината за тоа биле нарушените односи меѓу Вера и Маја.

„Подолго време не беа во добри односи, често се расправаа. Убиената Вера беше многу лоша жена, со ножови влегувала во дворот на Маја, ја плашела и неа и децата, а пред некој ден со камења фрлала по прозорците. Пријавиле и во полиција. Маја викаше ’вака не се живее, мора да ја уништам таа жена’. И така се случи“, раскажуваат соседите. Според нив, Вера била кај соседите кога била забележана од Маја.

„Но, бидејќи имала епилепсија, во тој момент и' се слошило и паднала. Но, кога се освестила уште мамурна ја зела косата и веднаш отишла да се пресмета со Вера. Со косата ја пресекла по главата, а потоа зела и една тула и ја убила. Се' признала и викала ’ја отепав оти ме малтретираше мене и децата’. Штета голема“, раскажуваат жителите на Смоларе.

Според нив, една од причините за постојаните кавги меѓу Вера и Маја била љубомората на Вера. Таа ја обвинувала Маја дека била во врска со нејзиниот сопруг.

„Вера постојано се расправаше со Маја и викаше оти била во врска со маж и' и тој постојано трчал по Маја, поради тоа често се расправаа и ете се случи оваа трагедија“, додава еден од соседите на убиената Вера.

Според некои од жителите, сопрузите на Вера и Маја биле во роднински врска. Телото на убиената старица е дадено на обдукција, а од вчера попладне осомничената Маја се наоѓа во 30-дневен притвор.(С.Т.)