Дојче Веле: ЕУ ја толерира блокадата на Македонија

Верувам дека бесконечната приказна со името ќе заврши многу скоро, вели Франко Фратини

Верувам дека бесконечната приказна со името ќе заврши многу скоро. Македонија заслужува да се реши ова прашање и сметам дека новата грчка влада по изборите ќе има и интерес да даде свој придонес, вели поранешниот шеф на италијанската дипломатија е еврокомесар за правда, слобода и безбедност Франко Фратини во изјава за Дојче веле.

- Што се однесува до мојата земја, Италија секогаш била блиска со Македонија. Мислам дека ќе биде во состојба да продолжи да и’ помага и да има улога во премостувањето на овој нерешен проблем, да влијае врз создавање клима на доверба, па конечно Европската унија на Македонија да и’ даде и датум за почеток на пристапните пореговори, истакна Фратини.

Тој смета Европа не треба да го сопре процесот на проширување, кој беше успешно искуство. Европската замореност треба да се спречи, зашто сите земји еден ден ќе станат дел од Унијата, вели Фратини кој синоќа во Берлин учествуваше во дискусијата „Повеќе Европа! Да, но како?“, на која повеќемина експери и политичари дебатираа за иднината на ЕУ и еврото.

Директорот на Европската академија Берлин Екарт Д. Стратеншулте, пак, смета дека по приемот на Хрватска и евентуално на Исланд, ќе следи подолга пауза во проширувањето.

- Европската унија во моментов нема сила да издржи големо проширување, но впечаток е дека сила немаат ниту кандидатите кои претендираат за члентво, оценува Стратеншулте.

За евроинтеграцијата на Македонија вели дека поради спорот за името со Грција, изгубила драгоцено време.

- Според мене, времето е изгубено без вина на земјата, но факт е дека тоа е изгубено. Жално е што Грција го блокираше почетокот на пристапните преговори, но исто е интересно да се види како останатите 26 членки на ЕУ, ваквото однесување на Грција го толерираа, заклучува Стратеншулте, според кого членките на европското семејство сесрдно не се залагале за продолжување на проширувањето, зашто во конкретнава ситуација - доколку тоа го сакале, имале и можност да притиснат врз Грција.

Прашан дали Германија може нешто да направи, со оглед на нејзиното влијание во ЕУ, Стратеншулте одговора потврдно, но не верува оти Берлин ќе преземе нешто поконкретно.

- Дали Германија може нешто да направи? Одговорот со сигурност би бил - ДА. Но, дали нешто ќе направи? Сметам дека нема, затоа што и на германската агенда проширувањето не е меѓу приоритетите. А, и Германците критички гледаат кон проширувањето, кога се во прашање државите од Балканот. Кога би говореле за Швајцарија или Норвешка, би било подруго, изјави директорот на Е��ропската академија Берлин