Грците изгласаа останување во еврозоната со Нова демократија!

Главното прашање во моментов е дали Нова демократија утре ќе успее да формира коалициска влада

Од нашиот дописник
Миркица Поповиќ

Атина - Грците изгласаа останување во еврозоната под палка на десничарите Нова демократија и Адонис Самарас во коалициска влада. Меѓу стравот за излез од еврозоната и надежта дека ќе може да им се пркоси на европските лидери победи стравот од најавуваната катастрофална изолација на Грција и излез од еврото. Лидерот на десничарите, Самарас триумфално дојде во прес центарот Запио и ја означи оваа победа како значаен момент и за Грција и за Европа. ЕУ лидерите може помирно да спијат, нивниот фаворит Нова демократија води на изборите со 30 отсто и 130 пратеници, а веднаш зад нив се радикалните левичари СИРИЗА на Алексис Ципрас со 26 отсто и 71 пратеници со повеќе од 80 отсто пребројани гласови. На третото место е поранешната владеачка партија ПАСОК со 12.6 отсто,а неонацистите Златна зора влегуваат во собранието со речиси 7 отсто од вкупниот број гласови и 19 пратеници. Во новото собрание ќе има седум партии односно и комунистичката партија, Демократска левица и десничарската Независни Грци.

Главното прашање во моментов е дали Нова демократија утре ќе успее да формира коалициска влада. Ниту една партија според досегашните резултати нема апсолутно мнозинство за формирање влада. Самарас вети итно формирање влада и ги повика сите проевропски сили да учествуваат со нив во влада за национален спас. Како клучни партии за формирање влада за национален спас ќе бидат ПАСОК и Демократска Левица,а првото и главно сценарио кое се смета за најверојатно е Нова демократија да формираат влада со ПАСОК и Демократска левица кои предизборно како услов за формирање коалициска влада ја поставија гаранцијата за останување на Грција во еврозоната.

Самарас во својата триумфална изјава посочи дека народот го избрал европскиот пат на Грција и останување во еврозоната. "Народот го избра политиките кои ќе донесат работни места, развој, правда и безбедност за грчкиот граѓанин. Нема да има нови перипетии. Не се поставува под прашалник местото на Грција во Европа", истакна Самарас. Лидерот на десничарите посочи дека државата нема време за губење ниту пак простор за партиски игри. Владата за национален спас според Самарас ќе донесе развој во економијата и гаранција за Грците дека најлошото поминало. Осврнувајќи се на соработката со ЕУ и договорот за штедење истакна дека ќе ги почитуваат обврските на државата. Зад оваа победа Самарас посочи дека стои тоа што му ја кажале вистината на народот, а не популистички ветувања како СИРИ��А. "Ќе соработувам со сите со внимание и стабилност за да ги оствариме националните цели. Нова Демократија беше е и ќе остане одговорна партија", заклучи Самарас.

Неговиот жесток и неочекуван противник, Алексис Ципрас му ја честита победата телефонски. Левичарското чудо на грчката политичка сцена за кого навиваше голем дел од народот и европската левица не успеа да ја оствари целта за прво место и левичарска влада, иако се уште останува мала можност доколку Самарас не успее да формира коалиција, тоа да го направи Ципрас. Меѓутоа без големо разочарување Ципрас испрати порака дека ќе бидат жестока опозиција и испрати порака дека владата која ќе се формира нема да може да работи без волјата на народот. Посочи дека народот два пати јасно и гласно во голем број гласал против мерките за штедење. "Нашиот предлог за пресврт и мерките за штедење е единствено одржливо решение за Грција и Европа", истакна Ципрас, додавајќи дека иднината не им припаѓа на исплашените туку на оние кои шират надеж.

Утре се очекува грчкиот претседател Каролос Папуљас да го повика Самарас и да му го даде првиот мандат за формирање влада. Претседателот на пладне ќе биде огфицијално информиран за резултатите од изборите од претседателот на собранието, а потоа ќе започне процесот за формирање влада. Лидерот на ПАСОК, Евагелос Венизелос во својот постизборен говор истакна дека ќе побара од претседателот за свикување на лидерска средба на сите партии кои се во собранието за формирање влада за национален спас. Во текот на вечерта имаше шпекулации дека Венизелос ќе бара и СИРИЗА да учествува во владата за национален спас.