МНР на Бугарија реагира за „антибугарски пројави во Македонија“

Министерството за надворешни работи на Бугарија денеска реагира на, како што се наведува, последните антибугарски пројави во Македонија.

- За жал, повторно на јавни настани во Скопје беше употребено името на Бугарија и на Бугарите во негативен контекст. Загрижени сме од некои пројави во соседна Република Македонија, се вели во писмената реакција објавена на веб страницата на бугарското МНР.

Таквите пројави, стои во реакцијата, “противречат на европските принципи и норми на политичко поведение, демонстрираат стереотипи од минатото и не се во согласност со стремежот на македонското општество да ги сподели европските вредности и да се присоедини кон заедничкото европско семејство“.

Бугарските медиуми посочуваат дека реакцијата на Софија следува по политичките расправии во Скопје предизвикани од преименувањето на некои улици, меѓу кои и по Тодор Александров, и одржаните јавни протести организирани од опозицијата на кои во негативен контекст се спомнувале Бугарија и Бугарите.

Реакцијата доаѓа само ден и по првата средба на претседателите на двете земји Ѓорге Иванов и Росен Плевнелиев на Самитот на ПСЈИЕ во Белград, на која заеднички се заложија сите проблеми и отворени прашања да се решаваат преку отворен дијалог и меѓусебно разбирање.