Бура реакции по договорот за декриминализација на клеветата

За претседателот на ЗНМ, Селмани „новинарите не може да бидат топовско месо во пресметките меѓу медиумите и неистомислениците“

Здружението на новинари на Македонија одговори на бројните критики по неочекуваното објавување на договорот со Владата нагласувајќи дека „новинарите ги добија сите точки што ги бараа, а критиките за самоцензура доаѓаат од оние што или не го прочитале предлог-законот или не сакаат да им се наруши комодитетот на уредничката функција“.

Првиот човек на ЗНМ, Насер Селмани, вчера изјави дека „новинарите не може да бидат топовско месо во пресметките меѓу медиумите и неистомислениците“. 

Според Селмани договорот во средата, по понеделничките протести и коментари за застој во дијалогот, бил под влијание на директорот на Директоратот за проширување за Европската комисија, Стефано Санино.

Инаку, бурата на реакции беше делот од договорт во кој се одредени казните за новинарите, но и за сопствениците - Стриктната казна е 2.000 евра за авторот на текстот, 10.000 евра за главниот уредник и 15.000 евра за сопственикот на медиумот.

За некои, Законот не е доволно јасен, други го поддржуваат, трети го отфрлаат. „Јас бев избран за да го решам проблемот и нема да се кријам зад референдум, како некои политичари“, дециден е Селмани.

Прес-конференција на ЗНМ, на некој начин беше реакција на насловната празна страна и коментарот под наслов „Да живее самоцензурата“ во „Вест“, каде што Селмани е вработен.

„Тоа е став на колегиумот на ‘Вест‘, при што јас не бев консултиран. Воопшто не го прочитале Законот, коментарот е неоснован“, возврати Селмани.

Европската комисија, пак, договорот за декриминализација на клеветата и навредата меѓу Владата и ЗНМ го смета за одличен, но изразија загриженост за одземањето на дозволата на А2 телевизија.

Премиерот Груевски во писмено соопштение изјави дека: „Декриминализацијата на клеветата е значаен чекор напред кон остварувањето на европските стандарди кон кои се стремиме, и добар модус дека со отворен и аргументиран пристап може да се постигне напредок, и верувам дека и во иднина дијалогот ќе донесе и нови резултати.“

Во меѓувреме, координаторот на ЗНМ за Битола и Прилеп поднесе оставка.

(Комплетна анализа на случувањата може да прочитате во петочното печатено и електронско издание)