ЗНМ и Владата се договорија за декриминализација на клеветата

На средбата беше договорена и максималната висина на паричните казни

Здружението на новинарите на Македонија (ЗНМ) и Владата на денешната средба постигнаа договор за декриминализација на клеветата и навредата и за висината на надоместокот на нематеријална штета.

Висината на надоместокот за нематеријална штета ќе биде 2.000 евра за авторот новинар, 10.000 евра за главниот уредник и 15.000 евра за сопственикот на медиумите.

Вицепремиерката задолжена за европски прашања Теута Арифи, која претседава со работната група за медиуми оцени дека овој договор покажува оти може да се разговара за сите прашања, ако целта е постигнување повисоки демократски вредности во општеството. Таа изрази верување дека постигнатиот договор ќе биде позитивно оценет и од страна на ЕУ.

За претседателот на ЗНМ Насер Селмани постигнато е прифатливо решение односно се работи за оптимален компромис за кој ќе се организираат и јавни дебати. Овој закон, потенцира Селмани, е во насока на подобрување и на судската пракса, но и на зајакнување на професионализмот и стандардите во новинарството.

- Законот е поставен казните да бидат на крај. Воспоставен е систем кој му дава можност на новинарот да ја докаже вистината на напишаното, ако во тоа не успее, да се извини, а има инструмент да се објави и демант. Крајна мерка ќе биде изрекување мерка надомест за нематеријална штета, појасни претседателот на ЗНМ, кој додаде дека ова е еден важен чекор за подобрување на состојбите во медиумите.

До септември, најави Селмани, треба да се исцрпат и прашањата поврзани со Законот за радиодифузија, Законто за работни односи, владините кампањи и МРТВ.