Три врби никнаа во Вардар

Деспина Трајковска

Трите живи врби никнаа среде Вардар. Од викендов тие го красат речниот тек, во близина на Камениот мост. Така, сега, старо-новиот центар на Скопје освен палми, фонтани и два нови моста на Вардар, ќе го красат и врбите кои можат да пораснат до триесет метри. Во случај да не се фатат, ќе пропаднат речиси 250.000 евра колку што е вредноста на договорот на Министерството и градежната фирма „Еуро проект“ од Селце, Тетовско, која го доби тендерот за реализација на проектот. Таа имаше обврска да ги набави врбите и да ги засади во специјални жардиниери. Тие се, всушност, изработени во вид на саксии, бетонски, обложени со нерѓосуван челик, широки по два метра. Врбите се од видот „салиџ алба“, кои ќе и' пркосат на скопската клима, според авторката на идејното решение, Искра Димитрова, создадена за виреење на врбите. Иако врби во Скопје има речиси на секој чекор, за овие се потрошија 82.000 евра за една. Веројатно, времето ќе покаже дали тие ќе успеат да го преживеат непредвидливиот Вардар.

Овој проект, кој беше промовиран пред повеќе години од страна на Министерството за култура, како дел од проектот за поставување на 35 скулптури во централното градско подрачје, се изработи по идејно решение на Искра Димитрова, а победи на конкурсот уште во 2008 година.

Таа тогаш за „Утрински весник“ објасни дека токму футуристичката нишка на овој проект, од една страна, и предизвикот во центарот на градот да се даде печат на вегетацијата која се' помалку ја има во централното градско подрачје, биле предизвик за неа при изработката на проектот. Напомена дека ги избрала врбите како синоним на реката, а Вардар како белег на Скопје, кој, всушност, ќе претставува природна средина за дрвјата. Димитрова потенцираше дека со идејното решение за врбите, кое е еден вид споменик, ќе се оддаде почит на вегетацијата на Скопје.

„Сакав да создадам нешто да има свој израз и автентичност за градот, сето тоа на еден посовремен начин. Во проектот, бетонот како суровост на урбаниот материјал го спротивставив на романтичниот аспект на врбите. Притоа водев сметка тие да не го попречуваат погледот на Камениот мост, бидејќи тој е еден од главните симболи на Скопје, а сепак да дадат доза на веселост на урбаниот пејзаж“, раскажа Димитрова за „Утрински“.

СДСМ: Врбите се сведок на недомаќинската власт

Опозицијата вчера реагираше на последниот проект што се реализира во центарот на Скопје. Поставувањето на трите врби во Вардар, за СДСМ е тажен потег на Владата во момент кога таа се задолжува со нови 250 милиони евра, а за врбите платила 250.000 евра.

„Ова е уште еден непродуктивен буџетски трошок во услови кога во претстојниот ребаланс се скратуваат средства онаму каде што се најпотребни. Додека се поставуваат жални врби на Вардар, директорката на Фондот за здравство жално ни соопштува дека кратењето на нејзиниот буџет само ќе ги одложело исплатите, а кратењето на боледувањата граѓаните немало да го почувствуваат. Жално, нема што!“, коментираше вчера Јани Макрадули, член на извршниот одбор во СДСМ. Опозицијата смета дека трите врби, всушност, сведочат за недомаќинско трошење на буџетските пари.

На прозивките експресно реагираа од ВМРО-ДПМНЕ. Истакнаа дека Макрадули ја манипулира јавноста, и оти станувало збор за проект стар три години. „Сето ова СДСМ пропушти да го направи цели 15 години. За разлика од СДСМ, ВМРО-ДПМНЕ гради и тоа останува за сите граѓани“, одговорија од владејачката партија набројувајќи владини проекти од неколку области.