Прва албанска паралелка во велешка гимназија

ВЕЛЕС - Дваесет и двајца ученици од албанската заедница се запишаа во првиот уписен рок во албанска паралелка која годинава првпат треба да профункционира во велешката гимназија „Кочо Рацин“. Во првиот уписен рок се пријавија 29 кандидати, но само дваесет ги имаа потребните 60 поени за упис. По второто пријавување, од седум се примени уште двајца ученици. Ова значи дека албанска паралелка во Велес, најверојатно, ќе биде отворена, бидејќи учениците имаат и втора шанса, да се пријават по 20 август. Тогаш ќе биде намален бројот на поените за упис од 60 на 50 поени. За да се формира оваа паралелка, потребно е минимум дваесет и пет ученици. Од гимназијата очекуваат уште тројца ученици да запишат во вториот уписен рок. (С.Ќ.Н.)