Невладини организации го обвинија Ристовски за хомофобија

Повод се неговите последни изјави за правата на хомосексуалците и маргинализираните групи

Четири невладини организации предводени од Хелсиншкиот комитет за човекови права ќе го тужат министерот за труд и социјала Спиро Ристовски за вознемирување, поради неговите последни изјави за правата на хомосексуалците и маргинализираните групи. Тие го обвинија министерот за хомофобија и за дискриминација.

За нив е, како што рекоа на денешната прес-конференција, големо разочарувањето дека владејачката структура претставена и преку министерот, го продолжува својот сензационалистички и недемократски монолог по однос прашањето на семејството, бракот, и конечно, истополовите заедници.

„Со двете последователни изјави министерот Ристовски направи недвосмислена дистинкција меѓу здравствената состојба на хетеросексуалните и хомосексуалните лица, односно оние растени во хетеросексуална или хомесексуална заедница“,потенцираат невладините организации, кои препознаваат дискриминаторски говор, бидејќи хомосексуалните лица и заедници се исклучени од поимањето на нашата Влада за здрава нација.

Според нив, министерот го раскинал македонското општество на два дела. Едниот дел го претставуваат, здравите брачни двојки кои биолошки се репродуцираат и и нудат на нацијата здрави и правилно развиени деца.А, останатиот сегмент на општеството го претставуваат сите оние двојки кои не ја исполнуваат ’светата мисија’ на репродукција на здравата нација, сите оние родители кои самите ги одгледуваат своите деца со сета можна љубов и извори на грижа, сите самохрани мајки, сите оние двојки кои имаат посвоено, изгледано и развиено деца надвор од ’вистинската биолошка форма на зборот’, сите оние граѓани кои ја имаат искористено современата технологија за да донесат на овој свет уште еден човечки живот.

Министерот за труд и социјална политика, Спиро Ристовски изјави дека Законот за семејство нема да се менува и нема да се дозволи склучување на хомосексуални бракови во Македонија.

„Во Законот за семејство јасно е дефинирано дека бракот е заедница меѓу еден маж и една жена и тоа ќе остане така додека ние раководиме со Министерството и со Владата. Како политичка партија имаме дадено многу јасен став во однос на хомосексуалните бракови“, изјави Ристовски.

Тој нагласи дека на геј-двојките нема да им се дозволи да посвојуваат деца. „Владата останува цврсто на ставот дека едно дете треба да расте со мајка и татко за да биде правилно развиено“,додаде тој. (П.Р)