Поглед

Кај Саркози ѕвонат првпат

Димитар Чулев

И не е важно каков резултат ќе покаже истрагата по инспекцискиот упад во домот на Саркозиеви и во канцелариите на „довчерашниот“ француски претседател. Значајна е пораката дека државните институции во Француската Република се суверени, а променливи се само вршителите на функции. И дека тие не се над законот и ништо поразлични од неговото величество граѓанинот, како што Франција ги почитува своите „поданици“.

Тешко е дека некој ќе се осмели судскиот налог за претрес да го третира како политички реваншизам кон експретседателот околу кој се вртеа афери за црни фондови од кои се финансирала неговата кампања во 2007 година или дека „му сместил секс-скандал“ на неговиот најсериозен ривал Строс-Кан. Афери што ги начнаа француските медиуми кои, наводно, исто така, биле прислушувани од „кабинетот во сенка“ на Саркози. Тој истиот за кого се вели дека бил во „финансиска“ врска со Гадафи, кој прв побара дисциплинирање на Либија од позиција на „втор“ во тандемот Меркози, иако некои викаат дека тој е понежната половина. За справување со еврокризата, де...

За се' ќе кажат фактите пред кои јавноста замолчува дури и кога се случува преседан во историјата на Франција, поштарот да заѕвони првпат на приватна претседателска врата. А Никола не ни беше дома. Тој од Канада каде што е на одмор со својата сопруга Карла Бруни ги демфуваше нападите и упадот дома. Интересен е спинот пуштен по медиумите дека Карла Бруни не е трудна со второ дете кое веројатно требаше да го дефокусира вниманието на јавноста од скандалот кој се чини допрва ќе се отвора.