Што криe Смилковското езеро

Пребарувањето на езерото e еден од клучните моменти за истрагата

Горан Адамовски



Што крие Смилковското езеро? Останаа ли траги во него што ќе и' помогнат на истрагата да ги фати бруталните убијци? Направија ли тие некоја грешка во чекори што ќе ја одведе полицијата до нив?

Рибари што го познаваат теренот, велат дека станува збор за езеро длабоко и до петнаесет метри. За форензичарите се важни и најмали траги, затоа пребарувањето на езерото е значаен дел од истрагата. Дали т.н. „железарско езеро“ беше пребарано и што е најдено во него?

Од Министерството за внатрешни работи тврдат дека езерото било пребарано во првите три дена по петкратното убиство, колку што траеше увидот.

„Тоа беше најдолг увид, траеше 3,5 дена. За тоа време, го пребаравме целиот терен во и околу езерото“, тврди Иво Котевски, заменик-министер за односи со јавност при МВР. Пребарувањето го извршиле специјалните нуркачи на Министерството.

Дали и какви докази биле пронајдени - не се знае. Извори од Институтот за судска медицина во Скопје велат дека кај нив до сега не бил донесен никаков материјал за вештачење, кој што бил изваден од езерото. Вештаците од Институтот беа ангажирани околу обдукцијата на телата на четирите убиени момчиња и рибарот, и ги вршеа првичните анализи на доказниот материјал пронајден при увидот. Од тогаш наваму, целата истрага сега е само во рацете на МВР, чии криминолози вршат реконструкција на настанот и анализа на увидниот материјал. Според судските медицинари, станува збор за пракса која што била применува и до сега и нема ништо спорно што експерти од МВР ќе ги вршат сите понатамошни анализи.

Новинарските екипи кои изминативе две недели речиси постојано известуваа од теренот околу Железничкото Езеро, каде што се случи злосторството, не забележаа нуркачки екипи како ја пребаруваат водената површина.

Рибарите, кои често го користат езерото за своето хоби, велат дека станува збор за води што се користат за наводнување и не се користат за пливање. Длабоко е од 10 до 15 метри и полно е со рипчиња како караш, сунчица, американски сомчиња, костреж и крап, поради што секогаш има рибари. Нема ниту чувари што е дополнителен плус за посетителите.

Што се однесува до истрагата за Велигденскиот масакр, МВР уште еднаш уверува дека напредува добро.

„Секојдневно имаме нови моменти, но не можеме да ги споделиме со јавноста“, тврди Котевски.

Суровата егзекуција на четирите момчиња на возраст од 18 до 21 година, како и на 45-годишниот рибар од Црешово се случи пред две седмици. Најмалку тројца убијци, според истрагата, со автомобил дошле кај езерото и ги застрелале Кире Тричковски, Филип Славковски, Александар Наќевски и Цветанчо Ацевски, кои се подготвувале да си одат дома. Убиен е и Борче Стефковски за кој се претпоставува дека бил случаен сведок на злосторството и затоа бил ликвидиран. Мотивите за злосторството какво што не памети Македонија, се' уште се непознати. Јавноста бара одговори и очекува успешна полициска истрага.