За граѓаните се многу 250 денари за здравствена картичка

На високата цена на здравствената картичка реагираат и вработените, но и невработените и пензионерите, иако за нив има попуст

Јасмина Јовановска

Издавањето на здравствената картичка, која за почеток треба да ги замени сините картони, а за која Министерството за здравство предлага цена од 250 денари или 100 денари за одредени категории лица, за поголемиот дел од граѓаните е праскапо. На високата цена на здравствената картичка реагираат и вработените, но и невработените и пензионерите, иако тие картичката ќе ја добијат со попуст, односно само за 100 денари.

И покрај тоа што засега не се знае кога ќе почне издавањето на новиот електронски здравствен документ за секој осигуреник, откако Министерството за здравство ја дефинира цената на картичката, се претпоставува дека тоа ќе се случи многу брзо. Посебно што во Фондот за здравствено осигурување стојат заглавени 700.000 апликации за електронската пропусница за потребите на здравството, а закочен е и целиот проект за здравствена картичка, кој се најавува веќе три години.

Пресметките покажуваат дека парите што ќе се соберат од здравствена картичка и тоа како ќе бидат добредојдени. Според првичните математики, со наплаќање на здравствените картички државата планира да инкасира најмалку пет милиони евра. Овие средства, како што велат неофицијални извори, ќе бидат доволни барем да продолжи таму каде што заглави изработката на информатичкиот систем кој е неопходен за да може ИТ- картичка да се применува во здравството. Посебно што никој од надлежните не се изјасни каде се потрошија парите наманети за овој проект за кој се најавуваа околу 10 милиони евра.

„Во семејството само јас работам, а имам сопруга и две мали деца. Не ми е јасно како може државата да измислува само нови давачки. Здравствените книшки чинат 80 денари, но нив не ги вадевме одеднаш, туку за секого посебно. Сега, за да имаме сите здравствени картички треба да издвојам 1.000 денари. Ме прашал ли некој мене како ќе ги најдам тие пари кога живееме со плата од 13.000 денари. Па 1.000 денари трошам само за мелко за децата, а сега ќе треба да и ги дадам на државата зошто решила да го менува системот. Зошто и картичката да нема симболична цена како и здравствената книшка или да биде бесплатна“, прашува еден 35-годишен вработен од Скопје.

На цената на здравствената картичка се жалат и невработените. „И двајцата сме невработени, со две деца. Живееме на грбот на родителите, а сопругот работи одвреме-навреме за дневница. Како ќе најдеме 400 денари, не знам“, вели невработена од Прилеп.

За здравствената картичка по 100 денари ќе плаќаат и самохраните родители и децата без родители. И тие се револтирани, зошто и за нив како и за социјалните случаи картичката треба да биде бесплатна. „Јас сум самохрана мајка на две деца. Платата ми е 10.000 денари. Сопругот ми е починат и никаде не работеше. Како јас ќе издвојам 300 денари само за да имаме здравствени картички. Па нема да ја подигнам се' додека не ми треба. Како може државата и од нас да зема пари. Јас не знам како да се прехраниме до крајот на месецот и да им купам на децата тоа што им треба за на школо, а не да мислам и на здравствени картички. Што им фали на здравствените книшки“, прашува една 33-годишна мајка од Кавадарци.

Во Сојузот на пензионери се изненадени од предлог-цената што Министерството за здравство ја одреди за издавање на електронската здравствена картичка. „Пред половина година се зборуваше едно, а сега излезе сосема нешто друго. Ќе се плаќа по 250 денари, а за оние со пензија до 15.000 денари, картичката ќе има повластена цена од 100 денари. Не може државата да прави дискриминација на пензионерите и да ги дели. Треба да има една цена на здравствената картичка која не треба да биде повисока од 50 до 100 денари. Посебно што има пензионери кои земаат пензија од 4.000, па и 5.000 денари. За нив и 100 денари се многу, зошто со пензијата не можат да ги покријат ни основните потреби, а секој дополнителен трошок е многу за нив“, објаснува Драги Аргировски, претседател на Сојузот на пензионерите. Од ова здружение најавуваат дека ќе реагираат до надлежните за да се најде некоја пристојна цена на овој нов здравствен документ.

Од Сојузот на синдикатите не сакаат да дадат каков било коментар, дали за нив е висока или не цената на здравствената картичка. „Официјално ќе го побараме правилникот за цената на здравствената картичка и тоа прашање ќе го изнесам пред 18-те гранкови синдикати, по што ќе се изјасниме дали цената одговара или не“, ни изјави претседателот на Сојузот на синдикатите на Македонија, Живко Митревски.