Судир во државниот врв за Чикаго?!

Премиерот Никола Груевски не отишол на Самитот на НАТО поради тоа што Македонија нема да добие покана за членство

Наум Котевски

„Не заминав во Чикаго затоа што Македонија нема да добие прием“, изјави во интервју за МИА, премиерот Никола Груевски, пред да им забележи на претседателот Ѓорге Иванов и на министерот за надворешни работи Никола Поповски што воопшто решиле да бидат дел од Самитот на НАТО. „Јас лично да бев на местото на претседателот немаше да отидам, а не сум сигурен дали и министерот за надворешни работи требаше да биде таму во услови на едно игнорирање од НАТО во овој изминат период“, рече Груевски, оставајќи сомнеж за раскол во државниот врв во врска со нашето присуство на Самитот во Чикаго.

Премиерот, чија изјава може да биде разбрана од јавноста како нарушување на досегашните прекоректни односи со претседателот, смета дека НАТО во оваа ситуација заслужува само присуство на заменик-министерот за надворешни работи.

„Тоа ќе беше реалното наше присуство наспроти очигледната незаинтересираност на најмоќните земји на НАТО кон Македонија, и очигледната нивна заинтересираност по секоја цена да и' бидат на услуга на Грција“, смета премиерот.

Тие, вели Груевски, преземаат товар, ако воопшто го чувствуваат како товар крајно некоректното однесување кон земја за чие членство „ја малтретираат со години, а секогаш ја канат кога им треба“.

Дали тоа е во моменти кога им треба за логистичка база како што беше при интервенцијата во 1999 година кон Србија или кога требаше да бидеме во Авганистан, во Ирак и други настани каде што им требаа сојузници, им треба нашата војска. Нашето присуство, нашето знаме, нашата одлучност“, жестоко го нападна Груевски НАТО за непринципиелност.

Премиерот понатаму со жестока реторика се прашува: „Не знам со кое лице ни се обраќаат одредени претставници на некои водечки членки на НАТО, или, пак, со кое лице не' озборуваат по кулоарите дека сме пропуштиле некаква шанса со Папандреу и слични дипломатски фрази, од кои верувајте ми, поради тоа што се крајно непринципиелни, ми доаѓа мачнина кога ги слушам“.

За Груевски, таква дволичност, таква политика на двојни стандарди, одамна како преседан се нема забележано.

„Капак на се' дојде и пресудата на меѓународниот суд во Хаг во недвосмислена наша корист. Знам дека некои политичари и дипломати не ги засега што непринципиелно дејствуваат, бидејќи сметаат дека се доволно силни за да го прават тоа и никој ништо да не им може, но има едно правило што секогаш кога некој во континуитет непринципиелно се однесува, со тек на време сите негови пријатели и соработници ќе ја загубат довербата во него“, порачува Груевски, кој кажа дека, сепак, треба да направиме дистинкција. „Кога го велам ова не сакам да се сфати дека важи за сите, бидејќи во НАТО има многу земји, политичари, дипломати кои отворено, искрено и недвосмислено, па дури и јавно не' поддржуваат и говарат искрено и принципиелно. Кога навистина има потреба и сме заслужиле знаат да не' критикуваат, но секогаш се држат до принципите наспроти голиот интерес“, вели Груевски, кој предупредува дека ваквата негова теза може да биде извадена од контекст.

„Можеби некој ќе проба да манипулира со неа заради тесни интереси, но ова го говорам чесно и со крената глава“, ќе поентира премиерот за кого само покана за членство претставува напредок. Евентуалните подобри заклучоци на Самитот во Чикаго, како што вели Груевски, се фрлање прав во очи.

„Ние ќе треба сега со денови да се радуваме на некои заклучоци и на крај да заклучиме дека Америка, Германија, Франција и други ни се големи пријатели, и да сме многу среќни, и да се чувствуваме должници за тоа. Ако Грција не извршеше исполнување на одлука на меѓународен суд кон Америка, Германија или Франција ќе се соочеше со санкции од Советот за безбедност. Истото и нам ќе ни се случеше ако не извршевме одлука во корист на Грција“, посочува Груевски.

Ѓорге Иванов

Македонија очекува јасен пат за членство

Македонија очекува дека лидерите на НАТО собрани на самитот во Чикаго ќе обезбедат јасен пат за македонското членство во НАТО. Притоа сите земји-кандидатки за членство, како и сите членки на НАТО, ќе загубат доколку Алијансата реши да ја затвори својата врата за Македонија, пишува во својата колумна претседателот на Република Македонија Ѓорге Иванов, објавена во "Чикаго Трибјун", еден од најчитаните американски днев��и весници.

"Одолговлекувањето на македонскиот прием практично ја затвори вратата на НАТО за нас и, на долг рок, ја поткопува тешко стекнатата стабилност во југоисточна Европа", пишува во колумната, што ја пренесе МИА.

Во неа се потсетува дека на самитот на НАТО во Букурешт во 2008 година земјите-членки на НАТО едногласно потврдиле дека Македонија ги исполнува сите услови за членство во НАТО, и дека единствената пречка е ветото на Грција. Претседателот Иванов ја истакнува пресудата на Меѓународниот суд на правдата од Хаг, која покажа дека Грција го прекршила меѓународното право со попречувањето на македонскиот прием на самитот во Букурешт.

"Македонија може да го земе своето заслужено место во НАТО доколку Грција ја испочитува Времената спогодба од 1995 година, склучена со поддршка на американските власти и помогната од Ричард Холбрук, со која Грција се обврза да не го попречува македонското членство во меѓународни организации под времената референца. Македонија останува силно посветена на изнаоѓање трајно, заемно прифатливо решение за спорот за името, и ќе продолжи да работи кон постигнување договор кој во исто време ќе ги зачува нашиот национален идентитет и достоинство, и ќе обрне внимание на грчките интереси. Но, состојбата на статус кво во врска со нашата апликација за членство во НАТО е неодржлива, како за нашата земја, така и за регионот и за Алијансата", пишува претседателот Иванов.

Тој додава дека сегашната состојба на блокирани интеграции е спротивна на националните интереси и на Соединетите Американски Држави, кои вложија многу во постигнување на стабилноста на југоисточна Европа.