ВМРО-Народна: Летаат непослушните

ВМРО-Народна, врз основа на сопствените анализи, утврдила дека целта на проектот „Нов бран“ не е отворање на партијата кон граѓаните, туку пропагандна акција преземена од учебник. И дека од раководни функции заминуваат луѓе кои досега покажувале блискост и коректни односи со ВМРО- Народна, или пак, луѓе кои покажале непослушност.

„Промените не се прават според однапред утврдени квоти. Како што инспекторите во УЈП им даваат квоти колку казни треба да изречат во текот на неделата, како што на сообраќајните полицајци им поставуваат норма за казни, така и раководството на ВМРО-ДПМНЕ има поставено квота колку функционери во секој град треба да бидат сменети“, велат од ВМРО-Народна и додаваат дека „целта е апсолутно пропагандна, а не суштинска.

„Таму каде што промените зависат од градоначалниците, а не од министрите има масовен отпор и непочитување на одлуките за промени“, тврдат од ВМРО- Народна.

Од ВМРО-ДПМНЕ одговорија дека тоа што ВМРО-Народна партија не ги разбира критериумите по кои работи партијата за нив е комплимент. „Според тие критериуми до кои се држи ВМРО-ДПМНЕ нема место за експертот за светски туризам Љубчо Георгиевски, нема место за експертот за царина и царинско работење Драган Даравелски, а нема место за експертот за енергетика и трговија Ламбе Арнаудов“, реагираше ВМРО-ДПМНЕ. (П.Р.)