„Бранот“ ги промаши термините

Распишани се конкурси за пополнување на функциите што беа зафатени со промените, кои однесоа и кадри кои во минатото успеаја да преживеат скандали

Наум Котевски
Веле Митаноски

Институциите зафатени од „Новиот бран“ почнаа да распишуваат јавни огласи за пополнување на испразнетите функционерски места. Пратеникот на ВМРО-ДПМНЕ, Александар Спасеновски, рече дека се инсистира овој процес да се одвива во соработка со граѓаните - отворено и транспарентно. Тој потенцира дека првата фаза од бранот, со кој се опфатени 150 позиции на разни нивоа, во најголем дел е остварен.

„Ги повикуваме сите оние што сметаат дека се квалитетни и може да ни помогнат, кои имаат енергија, свежина, капацитет, да се приклучат и да аплицираат по институциите за раководните места на огласите“, додаде Спасеновски.

„Бранот“ на ВМРО-ДПМНЕ на крајот од минатата недела го заплиска и Охридско Езеро каде што од позицијата прв човек на Капетанијата го сруши Љупчо Настоски. Тој е првата покрупна охридска риба која заплива грбно. Засега нема најави дека „Новиот бран“ ќе удри и на други раководни места во Охрид. Последните смени беа направени во Агенцијата за вработување и Центарот за социјални работи, институции што се под ингеренции на Министерството за труд и социјална политика, но во Охрид директорите куртулија. Можно е некој да биде сменет со најавените промени за следните денови.

Смената на Настоски го отвора прашањето кога владејачката политичка гарнитура ќе изгради чувство за моментот, за вистинскиот тајминг на оставката како личен морален чин, или, пак смената како партиска наредба, сеедно. За функцијата како одговорност, а не само привилегија. Дури сега некому му текна да ги тргне луѓето кои одамна требаше да бидат заборавени од јавноста.

Конкретно, Настоски ја раководеше Капетанијата кога се случи големата трагедија со потонувањето на бродот „Илинден“ на 5 септември 2009 година, при што загинаа 15 луѓе. Тој беше и во улога на сведок во судската постапка за трагичниот настан и си остана уште неполни три години на раководната функција. Некој може да праша зошто тој да си замине кога министерот за транспорт и врски Миле Јанакиески тогаш мудро понуди, а не поднесе неотповиклива оставка!

Неодамна бранот го поклопи и здравствениот сектор. Од раководната фотелја на Клиниката за гинекологија си замина Саша Јовчевски. Свежи се сеќавањата кога Јовчевски во април минатата година, непосредно пред изборите, сакаше да ја отвори Клиниката без технички прием. Дојдоа и новинари и камермани и фоторепортери да го овековечат тој настан, но „клучот го немаше“ - за време на циркусот го голтна Јовчевски.

Еден месец потоа гинекологијата беше отворена полупразна и неопремена, и тоа само за сликање, а директорот не знаеше колку е вкупната вредност на новата зграда. И во тоа време не беше потребна смена, или не дај боже оставка. Секако, индивидуалните смени ја немаат моќта на пакет промените.

Како што поминаа Настоски и Јовчевски, така помина и директорката на основното училиште „Невена Георгиева-Дуња“, Марина Милевска. Во февруари педесетгодишниот покрив на училиштето ја загуби битката со снегот. Се урна, но за среќа не повреди никого. И тогаш немаше смени и оставки за лицата, за кои од ВМРО-ДПМНЕ велат дека сега заминуваат од позиции откако го дале својот максимум во реализација на програмата.

И многу е јасно зошто. Доколку си заминеа на време, како што се случува во секоја цивилизирана земја, тогаш тоа ќе значеше признавање на вината.

Директорот на Центарот на комуникации на ВМРО-ДПМНЕ, Илија Димовски, не сакаше да ги коментира наведените случаи поединечно, сугерирајќи ни да им се јавиме ним лично. „Не можам да коментирам, затоа што не ги ни познавам луѓето. Може да побарате коментар и од општините“, рече Димовски, пред да додаде дека ваков модел на промени прв пат се случува во земјава.

„Тој е поздравен од голем број граѓани. Се одвива во стабилна атмосфера, по длабока анализа и политичка процена во сите општини. Тоа ни дава гаранција дека не правиме грешки“, потенцираше Димовски.