Граѓаните поделени меѓу име то и ЕУ

Кога би морале, граѓаните најмногу би ја прифатиле додавката „северна„

Македонските граѓани се поделија околу дилемата НАТО и ЕУ или уставното име на земјата. Во анкетата што ја спроведе Македонскиот центар за меѓународна соработка, на прашањето дали сте за НАТО и ЕУ и по цена на компромис околу името позитивно одговориле 40,5 отсто, додека блиски 39,6 отсто и натаму ��е за зачувување на името, и по цена на застој во евроинтеграцијата. Анкетата спроведена на 1090 испитаници покажува дека граѓаните би сакале многу (58 отсто) спорот да се реши годинава, но дека во огромен процент не веруваат дека ќе се случи тоа, а 24,2 отсто од нив не веруваат дека ќе се реши воопшто.

Толкувањата на МЦМС се дека анкетата покажала дека е во тек национално обединување околу спорот за името, односно граѓаните од сите етнички и партиски припадности ја бранат црвената линија за идентитетот и бараат одлука за името на референдум. Како паралела на грчката црвена линија ваквата обединетост е наречена гранитна црвена линија, бидејќи мнозинството граѓани (64 отсто) се против дефинирањето на државјанството како, на пример, „граѓани на Република Северна Македонија„, а уште поголем процент од нив (74 отсто) се противат на додефинирањето на јазикот во ОН, како на пример македонски јазик( официјален јазик на Република Северна Македонија). Она околу што исто така се обединети граѓаните е дека одлуката за името треба да се донесе на референдум, бидејќи 64 отсто се изјасниле за тоа.

Иако МЦМС го нагласи фактот дека за крајната опција, неменување на името, се определиле 45,3 отсто од испитаниците, не останува незабележано дека речиси исто толку се изјасниле за разни форми на компромис, од ново име за сите употреби, двојната формула, двојно име за меѓународна употреба до име за меѓународни организации, при што најголем процент се за двојната формула. Исто така, за „никаква промена„ лани биле 48,4 отсто од граѓаните а годинава три отсто помалку, што е симболично, но покажува дека Македонците се заситуваат од спорот, како што поминува времето.

Најинтересно е дека граѓаните веруваат во голем процент дека Грција, и да се реши спорот, ќе бара нови отстапки околу идентитетот и јазикот, се додека не го уништи македонскиот идентитет и дека решавањето може да доведе до раскол на предавници и патриоти. „Овие две закани се закани по опстанокот на нацијата и веројатно се главен мотив во одбивање компромис„, оцени Сашо Клековски, кој ја презентираше анкетата.

Во однос на географските одредници кои како додавка на името досега циркулираа во јавноста, за граѓаните најприфатлива е Северна, а по неа Скопје и Вардарска Македонија. Речиси секој четврти граѓанин притоа е подготвен да излезе на улица и да протестира за одбрана на името, јазикот и идентитетот. (С.Ј.)