10.11.2011, 14:50 Официјално - малолетници може да возат
Владата ги усвои новите измени во Законот за безбедност на сообраќајот, според кој, возачка дозвола од Б-категорија ќе може да добиваат и постари малолетници со наполнети 16 години.
Условите за тоа се: да поседува лична карта, да е здравствено и психофизички способен, да има завршено најмалку основно образование и да има согласност од родителите или старателот. Ограничени се да не смеат да управуваат со возилото во времето од 20 до 05 часот, освен ако со нив не е родител, односно старател, кој поседува возачка дозвола, а не му е изрекувана прекршочна санкција забрана за управување со моторно возило. Во Предлог законот се наведени и ограничувања во однос на брзините со кои смее да управува на јавен пат и автопат, но и глоба во износ од 300 евра за непочитување на законските одредби.
„Веруваме дека е подобро оваа категорија да ја едуцираме, отколку само да ја казнуваме“, смета министерката за внатрешни работи, Гордана Јанкулоска. Според податоците на полицијата, лани биле ресгистрирани 12.500 прекршоци „управување возило без возачка дозвола“, а лицата кои на овој начин управувале со возилото, учествувале во 448 сообраќајки, во кои 18 лица загинале, додека 657 биле повредени.
Со новите измени, се заострува казнената политика за запирање и паркирање на возила на места предвидени за движење на лицата со посебни потреби. Од досегашните 200, глобата се зголемува на 250 евра ако возачот односно сопсвеникот на возилото запре или се паркира на места предвидени за движење на лица со посебни потреби.
Од МВР информираа и за новите измени што се однесуваат на сообраќајот на крстосници со кружен тек на сообраќајот. (Г.А.)
|
