Ахмети: Во првите 100 дена ДУИ се акомодира




Лидерот на ДУИ Али Ахмети на денешната средба со новинарите во седиштето на партијата во Мала Речица ја оцени работата во првите 100 дена од владеењето на оваа коалиција, посебно од аспект на ангажирањето на партијата во функција на акомодација на новата влада.

Уште од почетокот на своето искажување, Ахмети нагласи дека ДУИ веднаш по изборите инсистирал за преземање поголема институционална одговорност, која се реализирала преку застапеноста во власта со двајца заменици премиери, пет министри, четири заменици министри, пет држави секретари и над 30 директори и заменици и други функционери. „По конституирањето на Парламентот, пратениците ја оценија иницијативата на ДУИ за автентично толкување на Законот за амнестија. Тоа придонесе за градење мерки на доверба меѓу заедниците, овозможувајќи да градиме иднина, но истовремено да го паметиме минатото“, рече на почетокот Ахмети. Лидерот на ДУИ нагласи дека пратениците правилно го оцениле барањерто за употреба на албанскиот јазик, за употреба на албанското знаме, нагласувајќи дека „ ДУИ нема да дозволи непочитување на знамето и уставните димензии за службена употреба на албанското знаме во државните институции“.

За Охридскиот договор Ахмети рече дека е моќен базамент на модерно, мултиетничко и мултикултурно општество, поставувајќи темели на нови односи меѓу заедниците и граѓанска еднаквост со почит кон различностите и одржувањето на етничките култури.
Во врска со прекинувањето на пописот, Ахмети рече дека: „ДУИ ја прифати оценката на Комисијата, зашто важноста на пописот е над статистчката операција и директно влијае на правата на заедниците и ги регулира односите меѓу нив. Овој попис треба да се реализира само по постигнување етнички и политички консензус заедно со целосна реформа на Државниот завод за статистика“. Во врска со буџетот за наредната година Ахмети смета дека ги содржи приоритетните проекти предвидени со предизборните програми.

За наредната година, како приоритети на ДУИ Ахмети ги смета образованието и албанската култура, како и инфраструктура што квалитетно ќе го поправи секојдневието и ќе овозможи подобри економски услови и унапредено поврзување со регионот. Меѓу приоритетите го набележа изградбата на плоштадот „Скендербег“, реконструкција на Албанскиот театар, неколку зафати во ДУТ, изградба на библиотека и театар во Тетово, железничка пруга од Кичево до границата со Албанија, модернизација на неколку патни правци во делот со доминантно албанско население, потоа хидросистемите Полог и Липково, зафати на Попова Шапка, филтер станица на водоводот во Гостивар, како и подигање центар за земјоделски производи во Полог. “Нема друга алтернатива освен зачленувањето на Македонија во НАТО. Ги ангажираме сите наши капацитети за решавање на прашањето со името. Ова прашање во заложништво ги држи нашите стремежи кон НАТО. Ги повикуваме нашите пријатели во меѓународната заедница да се приклучат кон што е можно поскоро затворање на овој проблем“. Во одговор на новинарско прашање на оваа тема Ахмети вели: „Времето минува и мора итно да се најде решение со името. Никогаш не сум рекол дека Груевски е пречка за решавање на овој спор. Напротив има силна политичка волја. Со Груевски заедно работиме и имаме заеднички ставови од интерес на државата“, одговори Али Ахмети. (Г.Е.)