08.11.2011, 11:48 Лекарот на Мајкл Џексон прогласен виновен за убиство без предумисла
Личниот лекар на Мајкл Џексон, Конрад Мари, е прогласен за виновен за убиство без предумисла во смртта на Кралот на попот, пренесоа светските агенции.
Поротниците се советуваа цели девет часа пред да дојдат до нивната едногласна одлука.
Доктор Мари се изјасни за невин за давањето на смртоносната доза од силното приспивно средство пропофол, што се смета за главната причина за смртта на ѕвездата на 25 јуни 2009 година.
За време на шестнеделниот судски процес обвинението наведуваше дека Мари пројавил груба професионална небрежност, затоа што на Џексон му дал пропофол во домашни услови за да му помогне да спие, додека пејачот се подготвувал за серија концерти, кои требаше да го одбележат неговото враќањена сцената.
Обвинителите, исто така, наведуваа дека Мари не ја следел состојбата на Џексон, го забавил барањето итна медицинска помош и на лекарите не им кажал дека на пациентот му дал пропофол.
Одбраната на Мари тврдеше дека Џексон сам ја зел фаталната доза пропофол.
При објавувањето на одлуката на поротниците над 100 фенови на Мајкл Џекосн се појавија пред судот со гласни ��ароли во одбрана на делото на нивниот миленик.
Судијата во процесот нареди Конрад Мари да се притвори до објавувањето на пресудата, што се очекува на 29 ноември.
Мари (58) го напушти судот со лисици на рацете и им беше предаден на затворските власти.
|
