08.11.2011, 21:56 Прва историска победа за Торус во БИБЛ
Со поените на Јован Марковски на две секунди до крај, избраниците на Боби Петровски стигнаа до заслужен триумф над Темишвар со 74:72.
Екипата на Торус во својот втор натпревар во БИБЛ Балканската кошаркарска лига на гостувањето кај Темишвар дојде до првата историска победа. Избраниците на Слободан Петровски славеа тесна, но заслужена победа од 74-72. Темишвар и Торус одиграа одличен натпревар со драматична завршница, која за среќа ја доби нашиот преставник и тоа благодарение на поените на Јован Марковски во последните секунди од мечот.
При нерешен резултат, на 13 секунди до крајот, Торус СЦБТ имаше напад. Перо Блажевски додаде до Јован Марковски под кошот по што имаше реализација за 74:72 и за прв триумф во Балканската лига и прва победа воопшто на меѓународните натпреварувања.
Димитар Караџовски беше најефикасен кај Торус СЦБТ со 20 поени, меѓу кои пет тројки, Ивица Димчевски и Јован Марковски дадоа по 12 коша, а Џастин Рејнолдс оствари 11 поени и 8 скокови.
Торус СЦБТ сега се искачи на делба на првото место на табелата со ист број бодови како и Морнар. За комплетирање на второто коло, утре играат Галил Билбоа - ОКК Београд и Рилски Спортист - Морнар.
|
