09.11.2011, 15:04 Русија и Грузија потпишаа договор за членство на Москва во СТО
Русија и Грузија денеска потпишаа договор за приклучување на Русија во Светската трговска организација (СТО), изјави грузиски дипломат.
Претходно двете земји договорија компромисна верзија на договорот, во чија изработка посредуваше Швајцарија. Документот предвидува распоредување на меѓународни набљудувачи на копнените гранични премини меѓу двете земји, кои ќе го контролираат протокот на стоки. Текстот од договорот меѓу двете земји беше усогласен минатата сабота.
Русија се обидува да пристапи во СТО од 1993 година. Кон крајот на април 2008 година Грузија се повлече од преговарачкиот процес за приклучување на Русија во СТО во знак на протест против одлуката на рускиот претседател да ги укине економските санкции против Абхазија и Јужна Осетија.
По „петдневната војна“ во август 2008 година и откако Москва ја призна независноста на Абхазија и Јужна Осетија, Тбилиси ги прекина дипломатските односи со Русија.
Грузија и Русија ги обновија преговроите во однос на прашањето за приклучување во СТО во март оваа година со посредство на Швајцарија.
|
