08.11.2011, 14:24 Волерс: Промените во Грција го комплицираат секој процес
Грција моментно поминува низ големи политички и економски промени и се додека се во овој процес тоа го комплицира напредокот на секој друг процес, а не само прашањето за името.
Ова го изјави денеска американскиот амбасадор во Македонија Пол Волерс, запрашан дали поради кризата во која се наоѓа Грција е конструктивен партнер за решавање на спорот за името.
Според Волерс, политичките и економските промени кај Грција не значат дека не може да се работи на решавање на проблемот за името, но, истакнува, нема да биде лесно.
- Секако, ние не сме кренале раце од прашањето. Процесот во рамките на Обединетите нации продолжува. Нашиот став во однос на тоа прашање останува непроменет, изјави Волерс, одговарајќи на новинарски прашања при посетата на Македонска берза.
Американскиот амбасадор Волерс ја посети Македонската берза
Македонска берза АД Скопје во актуелниот турбулентен период на светската финансиска сцена ја извршува непречено и ефикасно својата функција како неопходна инфраструктура во националната економија за пазарно формирање на цените на хартии од вредност и нивна дистрибуција.
Такво уверување изнесе денеска извршниот директор на Македонската берза АД Скопје Иван Штериев, пред американскиот амбасадор во Македонија Пол Волерс, кој ја посети берзата и се запозна со нејзиниот историјат, организациска поставеност и принципи на работење.
Токму поради овие кризни состојби, истакна Штериев, а имајќи го предвид нивото на развиеност во развиените пазари и во регионот, за некои наши компании, сепак, допрва следува времето кога на локалната или на меѓународните берзи ќе гледаат на докапитализацијата како извор за финансирање.
- Генерално сметам дека состојбата по финансиската криза, не само во нашата економија туку и пошироко, ќе принуди некои од компаниите да не се потпираат само на банкарско финансирање, туку да прават некој соодветен микс и да ги гледаат пазарите на капитал како алтернативен извор, појасни Штериев.
Амбасадорот Волерс истакна дека е задоволен од можноста да добие информации за функционирањето на економскиот систем во Македонија, каде, како што рече, Берзата игра клучна улога.
Тој изрази задоволство од важната улога на УСАИД во развојот на Берзата и обуката на вработените.
- Ова е одличен пример што ја покажува соработката на двете земји во проекти што помагаат во развојот на Македонија, изјави Волерс.
Според него, секогаш имало американски компании што биле заинтересирани да инвестираат во Македонија.
- Сите интернационални компании, не само американските, бараат места со стабилна клима за инвестирање на своите пари. Независноста на судството, слобода на медиумите, образовниот систем и други аспекти се многу важни во креирањето на оваа поволна клима за инвестирање, рече амбасадорот Волерс при посетата на Македонска берза.
|
