09.11.2011, 09:11 Составот на новата влада во Грција ќе биде објавен денеска
Составот на грчката коалициска влада ќе биде соопштен денеска по состанокот на партиските лидери.
Грчкиот премиер Јоргос Папандреу денеска ќе се сретне со шефот на државата Каролос Папуљас, кој потоа ќе претседава со состанокот на партиските лидери, по што ќе следи објавувањето на составот на новиот кабинет.
Папандреу доцна синоќа ја напушти зградата на Парламентот откако преговорите со лидерот на опозицијата Андонис Самарас веќе трет ден по ред останаа без индикација за успех. И двајцата не изјавија дека постигнале договор, и покрај силниот притисок на кој е изложена Грција од своите европски партнери за наоѓање решение за внатрешнополитичката криза, која му се заканува на еврото.
Новиот грчки премиер е обврзан да побара средба со претседателот на државата за да му го предаде мандатот.
Папандреу вчера побара од членовите на својата Влада да поднесат оставки за процедурата да се забрза.
Според неофицијални сознанија, премиерската функција му е понудена на Лукас Пападемос (64), поранешен потпретседател на Европската централна банка, кој поставил повеќе услови за преземање на ова место.
Резервни кандидати, чии имиња циркулираат, се европскиот омбудсман Никофорос Диамантурос (69) и поранешниот министер за финансии Панагиотис Румелиотис, која ја претставува Грција во ММФ.
Новата коалициска влада ќе има за задача да го примени новиот европски спасувачки план за Грција, прифатен од лидерите на ЕУ кон крајот на минатиот месец, по што во земјата ќе се одржат предвремени парламентарни избори, најверојатно во февруари.
|
