(ФОТО) Наскоро во Албанија со лична карта




За две години Тирана ќе ни биде поблиска за сто километри, најави албанскиот премиер Сали Бериша.

Слободанка Јовановска

Фото: Петр Стојановски

Македонските и албанските граѓани набргу ќе ја поминуваат границата само со лична карта, најави премиерот Сали Бериша денеска од Скопје, по средбата со премиерот Никола Груевски. Според Бериша, ќе се направи се за да се поврзат што повеќе двете земји, па спомена дека за две години дистанцата меѓу Скопје, Дебар и Тирана ќе се намали за 103 километри, а таа преку Струга за еден час. Бериша најави можност и за нееднаква царинска унија меѓу Албанија, Македонија и други земји во регионот по примерот на Европската унија, но ниту една од овие најави не беше потврдена од страна на премиерот Груевски. Место тоа, македонскиот премиер само му даде поддршка на Бериша за добивањето статус кандидат за ЕУ на Албанија, а Бериша му возврати со поддршка за членство на Македонија во НАТО, заеднички оценувајќи дека иднината на двете земји е во евроатлантските интеграции.

„Сакам да гарантирам дека за Албанија односите �� соработката со Македонија се многу битни и им посветуваме исклучително внимание“, изјави Бериша, додавајќи дека Македонија практично е членка на НАТО и треба само да го реши спорот со Грција.

Според најавите, Груевски и Бериша имаа тет-а-тет средба и дојдоа на прес конференцијата четириесетина минути подоцна од планираното. Претходно, Бериша се сретна со лидерот на ДУИ, Али Ахмети, кој му дал отчет за се што неговата партија успеја да издејствува околу барањата на Албанците во Македонија, од амнестијата за хашките случаи, употребата на албанскиот јазик, на албанското знаме до имплементацијата на Охридскиот договор. Лидерот на ДУИ го запознал Бериша и со проектот за плоштадот Скендербег, за патот Кичево – Дебар, железничката пруга Кичево – Ќафасан и библиотеката и театарот во Тетово.

Бериша, според информациите од ДУИ, сметал дека по конфликтот од 2001 година, правата на Албанците во Македонија се видливо унапредени и голем напредок е постигнат во зголемувањето на политичката тежина на Албанците. Истовремено, тој и Ахмети се договориле заеднички да ги прослават 100 годишнината на Денот на знамето и независноста на Албанија.

Бериша имаше средба и со претседателот Ѓорѓи Иванов и лидерот на СДСМ, Бранко Црвенковски, по што замина на средби во Тетово.

Околу најавата за поминување на границата со лична карта, нешто на што долго време се противеше Македонија, а го бараше Албанија, министерката Гордана Јанкуловска вчера објасни дека договорот не е потпишан се уште, но верува дека тоа ќе се случи брзо.