04.11.2011, 13:48 Каубојска пресметка во кафе бар во Охрид
Охридската полиција од синоќа трага по насилниците кои упаднале во кафе бар, пукале и го запалиле, по што побегнале.
Според соопштението на МВР, вооружениот инцидент се случил во кафе-барот „Пијано“, кој се наоѓа на улицата „Абас Емин“ во Охрид, а сопственик е Џ.А.
Неколкумината напаѓачи упаднале синоќа околу 21 часот и 30 минути. Со патничко моторно возило „Ауди“ со охридски регистарски таблици пристигнале пред „Пијано“ барот.
Во барот влегле вооружени - едниот со два пиштоли, а вториот со ловечка пушка, по што, со викање и навреди кон сопственикот на објектот, оружјето го впериле кон вработените.
Третиот, од пластична туба започнал да го прска ентериерот на барот со бензин, по што го запалиле. Од огнот изгореле завеси и друг дел од инвентарот во објектот.
Бегајќи од „Пијано“ барот, во кој за кратко време се слушнала експлозија, тие испукале неколку истрели од ловната пушка.
По кратко време, напаѓачите застанале на една бензинска пумпа на излезот од Охрид. Тука побарале сет за прва помош, по што избегале од бензинската станица без да ја платат сметката од 3.000 денари за горивото.
СВР Охрид го знае идентитетот на можните сторители по кои се трага.
|
