(ВИДЕО) Меси ја спаси Барселона во последна минута

Барселона заостана на три поени зад Реал Мадрид откако одигра 2:2 на гостувањето кај Атлетик Билбао, а бодот го спаси Меси со гол во 91-та минута.

Гостувањата во Билбао се секогаш тешки, а овој пат дополнителен проблем за Барселона претставуваше и скоро поплавениот терен на кој домаќините добро се снаоѓаа. Тие поведоа во 20-та минута со голот на Херера, а само четири минути подоцна израмни Фабрегас. Барселона имаше неколку шанси за водство до крајот на полувремето, но резултатот остана непроменет.

Барселона ја имаше иницијативата во второто плувреме, имаше повеќе од поседот на топката и креираше шанси, но реализацијата изостана. Шокот за шпанскиот шампион се случи во 80-та минута кога шутираше Љоренте, а Пике го измами голманот Валдес. На три минути до крајот, Билбао остана со десет фудбалери откако беше исклучен Аморабиета, а во последната минута од натпреварот Меси успеа да израмни и да ја спаси Барселона од пораз.

Со истиот резултат заврши и дуелот помеѓу Сарагоса и Хихон, а на другите натпревари, Ваљакано со 4:0 го победи Реал Сосиедад, Гранада и Сантандер одиграа без голови исто како и Еспањол и Виљареал. На последниот натпревар од 11-то коло, Хетафе го совлада Атлетико Мадрид со 3:2.