03.11.2011, 13:54 Тошак го повика Наумоски, во комбинација и Фетаи
Селекторот на македонската фудбалска репрезентација објави список со 24 играчи за пријателскиот дуел со Албанија на 15 ноември во Прилеп
Селекторот на фудбалската репрезентација на Македонија, Џон Тошак, објави список со 24 играчи за претстојниот пријателски дуел со Албанија на 15 ноември во Прилеп (13 часот). Во комбинација меѓу стативите се враќа Един Нурединовски, опција за нападот повторно е Илчо Наумоски. Втор настап во националниот тим ќе очекува и Бајрам Фетаи од дански Лингби (дебитира за Македонија во Корча во ремито без голови со Албанците), а меѓу повиканите се наоѓаат и играчот со дефанзивни задачи во чешкиот тим на Млада Болеслав, Владимир Димитровски и фудбалерот за врска на кипарски Алки од Ларнака, Никола Глигоров. Филип Деспотовски од Работнички и Ферхан Хасани од Шкендија се единствените двајца во списокот што во моментот настапуваат во македонското фудбалско првенство.
Засега е неизвесен само Горан Попов. И покрај повредената тетива тој ќе допатува во Скопје како и сите останати кои се жалат на повреди. Дали ќе биде подготвен за настап во Прилеп ќе се знае по лекарските прегледи.
Собирот на репрезентативците е закажан на 9 ноември во хотелот „Александар Палас“ во Скопје и веќе наредниот ден експедицијата ќе замине во Охрид каде ќе се подготвува за дуелот со селекцијата на нашиот западен сосед.
Голмани: Един Нурединовски (Етникос Ахна/Кипар), Мартин Богатинов (Карпати/Украина), Томе Пачовски (Жерминал/Белгија)
Одбрана: Горан Попов (Динамо Киев/Украина), Александар Тодоровски (Полонија Варшава/Полска), Ванче Шиков (Волин/Украина), Даниле Мојсов (Војводина/Србија), Владимир Димитровски (Млада Болеслав/Чешка), Николче Новески (Мајнц/Германија), Даниел Георгиевски (Шибеник/Хрватска), Владе Лазаревски (Амиен/Франција), Александар Лазевски (Партизан/Србија)
Среден ред: Величе Шумуликоски (Сибир/Русија), Мухамед Демири (Тун/Швајцарија), Марио Ѓуровски (Металург Доњецк/Украина), Филип Деспотовски (Работнички/Македонија), Никола Глигоров (Алки Ларнака/Кипар)
Напад: Иван Тричковски (АПОЕЛ/Кипар), Бајрам Фетаи (Лингби/Данска), Горан Пандев (Наполи/Италија), Агим Ибраими (Марибор/Словенија), Мирко Ивановски (Арка/Полска), Ферхан Хасани (Шкендија/Македонија). (С.Д.)
|
